VOV4.Êđê - Tlam hruê 4/8, ti Hà Nội, Khua bruă kƀĭn ala Vương Đình Huệ gĭt gai leh klei bi tuôm hŏng phung knuă druh bruă mdrao mgŭn mŏng dŭm sang êa drao gưl dlông nao kơ ƀuôn prŏng Hồ Chí Minh lehanăn dŭm čar kwar Dhŭng nao mdrơ̆ng hŏng klei ruă Covid 19. Bi ala phung khua kiă kriê Đảng lehanăn Knŭk kna blŭ hrăm ti knăm bi tuôm, Khua bruă kƀĭn ala Vương Đình Huệ bi êdah klei mgei ai tiê dưi bi tuôm hŏng phung knuă druh, nai aê mdrao bi ala kơ giăm 3 êbâo čô mă bruă mdrao mgŭn mprăp nao hlăm hdră gang mkhư̆ klei ruă Covid 19 ti ƀuôn prŏng Hồ Chí Minh lehanăn dŭm čar kwar Dhŭng.

Khua bruă kƀĭn ala Vương Đình Huệ h’êč hmưi kơ jih jang knuă druh, phung nai aê mdrao, phung mă bruă mdrao mgŭn lŏ dơ̆ng mđĭ lar ai tiê thâo bi đru, jing msĕ si amĭ ênang, mđĭ lar klei thâo čiăng dlăng kriê, dŏng mdrao kơ mnuih ruă, hrăm mbĭt hŏng dŭm čar, ƀuôn prŏng kwar Dhŭng msưh kdŭn klei ruă, bi leh jăk bruă klam mâo kčah jao, hnưm wĭt hŏng gŏ sang mbĭt anăn đăo knang hŏng klei mă bruă mơ̆ng jih anôk bruă kđi čar, dŭm čar, ƀuôn prŏng kwar Dhŭng hnưm lŏ wĭt hŏng klei hdĭp jăk msĕ êlâo./.

H Nêc pô mblang