VOV4.Êđê- Tlam mmăt mbruê 7/7, ti sang bruă kƀĭn ala, khua bruă kƀĭn ala Vương Đình Huệ mâo leh klei blŭ hrăm êlan online hŏng khua kiă kriê Hạ viện ala čar Marocco Habid El Malki (Ha-bíp En Man-ki). Hlăm klei blŭ hrăm anăn, 2 čô khua gĭt gai mñă klă, Việt Nam lehanăn Maroco mâo klei jĕ giăm jăk siam mơ̆ng đưm, 2 ala čar jing kbưi ƀiă dah mâo lu klei msĕ hlăm ƀuê ênuk lehanăn klei đĭ kyar, jing 2 ala čar hlăk dôk đĭ kyar, lehanăn jing ƀĭng hgŭm dŭm ala čar klah lehanăn êpul êya dŭm ala čar blŭ klei prăng.

Anei jing klei găl kơ bruă lŏ mđĭ klei bi mguôp 2 nah hlăm dŭm hră êlan ti anăp. 2 tĭng lŏ mđĭ lar klei bi mguôp hlăm dŭm klei kƀĭn lu ala čar msĕ si IPU, APE lehanăn dŭm êpul êya Nghị Viên mkăn, bi mâo klei sa ai kơ grăp bruă ngă hlăm dŭm boh klei ti alŭ wăl lehanăn tar rŏng lăn dôk uêñ mĭn. Hrăm mbĭt ngă bruă ksiêm dlăng bruă tui ngă dŭm klei kuôl kă pla wah 2 knŭk kna lehanăn dŭm phŭn, dhar bruă 2 ala čar, čiăng kơ dŭm klei kuôl kă anei dưi ngă hrăm mbĭt, mâo boh tŭ dưn lehanăn klă mngač, djŏ hŏng klei bi mjĕ bruă kđi čar 2 ala čar.

Pô mblang: Y-Ƀel Êban