VOV4.Êđê-  Blŭ hrăm ti anôk mă bruă hŏng Anôk bruă ksiêm tĭng knŭk kna hlăm tlam hruê 12/8, Khua bruă kƀĭn ala Vương Đình Huệ mtă, bruă phŭn hlăm thŭn 2022 mơ̆ng Anôk bruă ksiêm tĭng knŭk kna jing hưn mdah kluôm bruă hluê ngă klei mkiêt mkriêm, bi kdơ̆ng hŏng klei bi liê pliă plia wưng thŭn 2016 – 2021 hlăm bruă ngăn prăk knŭk kna, mnơ̆ng hlăm gŭ lăn, bruă lăn ala. Bi mni bruă klam mơ̆ng Anôk bruă ksiêm tĭng knŭk kna wưng êgao, Khua bruă kƀĭn ala Vương Đình Huệ lač, anôk bruă ksiêm tĭng knŭk kna mă leh klei hriăm ngă bruă mơ̆ng tar rŏng lăn, ba yua hlăm klei dôk mâo ti Việt Nam, hnơ̆ng tŭ hdră ngă bruă ƀrư̆ hruê dưi mkra mđĭ, mjing k’hưm prŏng, jing anôk bruă ksiêm tĭng ngăn prăk knŭk kna mâo klei đua klam. Hlăm wưng ti anăp, Khua bruă kƀĭn ala Vương Đình Huệ mtă, knuă druh Đảng viên hlăm anôk bruă ksiêm tĭng knŭk kna brei mâo Hdră kčah ngă bruă mđĭ klei thâo, boh tŭ hdră mă bruă mơ̆ng anôk bruă ksiêm tĭng knŭk kna, čih mkra hdră kčah ngă bruă truh ti thŭn 2030 hlăm wưng dôk hluê ngă Hdră mtrŭn mrô 13 mơ̆ng Đảng lehanăn dŭm Hdră mtrŭn djŏ tuôm hlăm wang 5 thŭn hŏng anei./.

Pô mblang: H’Nêč Êñuôl