VOV4.Êđê- Lŏ čuê klei nao čuă lehanăn mă bruă hŏng dŭm čar krĭng Lăn Dap Kngư, hruê mbruê 01/07, khua bruă kƀĭn ala Vương Đình Huệ mâo leh klei mă bruă hŏng čar Dak Nông. Blŭ hlăm hruê mă bruă, khua bruă kƀĭn ala čih yap yuôm bhăn čar Dak Nông dưi mkŏ mjing tŭ jăk bruă ruah khua bi ala bruă kƀĭn ala leh êpul gơ̆ng bruă ƀuôn sang dŭm gưl, ti tluôn klei kƀĭn kluôm bruă Đảng, čar Dak Nông dưi bi kluôm ênŭm leh mnuih mă bruă mơ̆ng gưl čar, kdriêk truh kơ să, mkŏ mjing hdră êlan tui ngă hdră mtrŭn klei kƀĭn kluôm bruă Đảng tal 13 leh anăn hdră mtrŭn mơ̆ng klei bi kƀĭn bruă Đảng čar tal 12 tŭ jăk.

Hlăm 6 mlan akŏ thŭn anei, bruă duh mkra lehanăn yang ƀuôn hlăm čar mâo klei hơĭt kjăp, mâo hnơ̆ng đĭ 6,03%, anei jing klei gĭr năng čih yap mkă hŏng hnơ̆ng kah knar hlăm ala čar, ênoh prăk lŏ hrui wĭt mâo 58%. Khua bruă kƀĭn ala mñă klă, hlăm klei găl dưi ksiêm dlăng jăk klei ruă tưp, čar Dak Nông mâo mmông găl mđĭ kyar, bruă bi mguôp hlăm alŭ wăl.

Bi mguôp klei mkra mjing lehanăn ba yua, mtrŭt mjhar duh bi liê bruă mbĭt, mkŏ mjing dŭm hdră mkăp hlăm bruă lŏ hma, mđĭ kyar dŭm mnơ̆ng dhơ̆ng găl hlăm wăl. Sa hlăm dŭm boh klei năng mđing ti čar Dak Nông hlăm dŭm hruê leh êgao jing klei êngiê, khua bruă kƀĭn ala mnă klă, čar Dak Nông čiăng mkŏ mjing sa boh phŭn yuôm bhăn, dưi mgaih msir anôk nao lehanăn anôk truh.

Ăt ti hruê mbruê 1/7, khua bruă kƀĭn ala Vương Đình Huệ lehanăn êpul bi ala bruă nao čuă lehanăn đup brei mnơ̆ng dhơ̆ng kơ knuă druh, kahan ksiêm čar Dak Nông. Anei jing bruă bi ruĕ klei nao čuă lehanăn mă bruă mơ̆ng khua bruă kƀĭn ala Vương Đình Huệ lehanăn êpul bi ala bruă ti krĭng Lăn Dap Kngư.

Pô mblang: Y-Ƀel Êban