VOV4.Êđê - Aguah mbrue (29/6), ti Hải Phòng mkŏ mjing leh klei bi kƀĭn tal sa, Êpul gơ̆ng bruă ƀuôn sang ƀuôn prŏng Hải Phòng gưl 16, Knơ̆ng bruă sang čư̆ êa ƀuôn prŏng Hải Phòng hâo mdah boh tŭ dưn klei ruah khua, lehanăn bi klă knhuah jing phung bi ala Êpul gơ̆ng bruă ƀuôn sang ƀuôn prŏng gưl 16, wưng păn bruă 2021 - 2026. Ăt ti anôk bi kƀĭn anei, phung bi ala Êpul gơ̆ng bruă ƀuôn sang ƀuôn prŏng ngă leh klei ruah phung păn bruă knơ̆ng hlăm Êpul gơ̆ng bruă ƀuôn sang, lehanăn knơ̆ng bruă sang čư̆ êa ƀuôn prŏng, dŭm anôk bruă hlăm Êpul gơ̆ng bruă ƀuôn sang, khua hlăm knơ̆ng bruă sang čư̆ êa ƀuôn prŏng; ruah Êpul nô tap yang ƀuôn mơ̆ng Sang phat kđi yang ƀuôn ƀuôn prŏng hlue djŏ hŏng klei bhiăn čon čuăn, kñăm mkŏ mjing, bi kjăp êpul bruă sang čư̆ êa alŭ wăl, rơ̆ng dưi ngă bruă hŏng klei tŭ dưn hlăm wưng ti anăp. Nao lehanăn blŭ hrăm ti anôk bi kƀĭn, Khua bruă kƀĭn ala Vương Đình Huệ čang hmăng, lehanăn mâo klei đăo knang, hlăm dŭm thŭn 2021 - 2026, Êpul gơ̆ng bruă ƀuôn sang ƀuôn prŏng Hải Phòng srăng lŏ dơ̆ng mlih mrâo kjăp hĭn kơ klei mkŏ mjing, lehanăn bruă ngă, bi leh jăk bruă čuăn mâo jao, lŏ dơ̆ng atăt Hải Phòng jing gru mngač hlăm bruă mđĭ kyar klei duh mkra ala ƀuôn hlăm kluôm ala./.

Y Khem pô mblang