VOV4.Êđê- Hlăm klei blŭ hrăm ti anôk bruă kƀĭn ala, ƀri Hruê phung kahan êka êkeh, djiê êngiă 27/7/2021, Khua bruă kƀĭn ala Vương Đình Huệ mñă klă, hluê ngă jăk hdră mtrŭn brei klei jăk găl kơ mnuih mâo bruă tŭ dưn jing klei khăp, klei đua klam yuôm bhăn mơ̆ng jih anôk bruă kđi čar lehanăn mnuih ƀuôn sang, rơ̆ng kơ klei đĭ kyar lehanăn klei mtăp mđơr hlăm yang ƀuôn, đru bi kjăp klei hgŭm mguôp jih jang djuê ana, mđĭ klei đăo knang mơ̆ng mnuih ƀuôn sang hlăm Đảng, Knŭk kna. Bi ala Anôk bruă kƀĭn ala, Khua bruă kƀĭn ala Vương Đình Huệ m’ĭt truh kơ phung mă bruă cách mạng sui thŭn, phung Amĭ Việt Nam Jhŏng ktang, Phung Jhŏng ktang djă phao ktuang, phung kahan êka êkeh, kahan ruă duam, găp djuê kahan djiê êngiă, mnuih mâo bruă tŭ dưn hŏng cách mạng hlăm kluôm ala čar asăp čuă êmuh, klei khăp lehanăn klei lač jăk prŏng prĭn. Khua bruă kƀĭn ala Vương Đình Huệ mñă, klei săn asei, klei myơr prŏng prĭn mơ̆ng phung mă bruă cách mạng đưm êlâo, phung jhŏng ktang djiê êngiă, kahan êka êkeh, ruă dua, gŏ sang kahan djiê êngiă, mnuih mâo bruă tŭ dưn jing boh kdrŭt mtrŭt mđĭ ai yuôm bhăn, lŏ mđĭ ai ktang čiăng kơ kluôm Đảng, jih jang mnuih ƀuôn sang lehanăn lĭng kahan găn klei dleh dlan, lông dlăng, mkŏ mkra lehanăn mđĭ kyar ala čar sah mdrŏng hĭn./.

Pô mblang: H’Nêč Êñuôl