VOV4.Êđê - Aguah mbrue (10/6) ti sang bruă kƀĭn ala, mkŏ mjing leh klei bi kƀĭn tal 7 Êpul gơ̆ng bruă ruah khua ala čar, khua bruă kƀĭn ala, Khua êpul gơ̆ng ruah khua ala car Vương Đình Hụê kiă kriê klei bi kƀĭn. Blŭ hrăm ti anôk bi kƀĭn, Khua bruă kƀĭn ala Vương Đình Hụê brei thâo, leh mprăp êmiêt djăp ênŭm, klă mngač, hŏng klei kreh knhâo, lehanăn mbruă, snăn klei ruah khua pô bi ala bruă kƀĭn ala, pô bi ala Êpul gơ̆ng bruă ƀuôn sang dŭm gưl mâo mkŏ mjing leh hlăm ai êwa mơak mñai, hnŭk êngiê, mtăp mđơr, djŏ hdră bhiăn lehanăn êđăp ênang hlăm klei mkiêt mkriêm, mâo leh klei tŭ jing jăk siam.

Ti anôk bi kƀĭn tal anei, Êpul gơ̆ng bruă ruah khua ala čar mâo leh klei blŭ lehanăn bi klă hră mơar ksiêm wĭt klei ruah khua pô bi ala bruă kƀĭn ala; Hdră mtrŭn mâo bi êdah boh tŭ dưn anăn phung djŏ ruah phung bi ala bruă kƀĭn ala gưl 15. Kơ hdră êlan, hruê mmông, kdrêč mta bruă mơ̆ng klei bi kƀĭn kluôm ala ksiêm wĭt bruă ruah khua pô bi ala bruă kƀĭn ala gưl 15, lehanăn pô bi ala Êpul gơ̆ng bruă ƀuôn sang dŭm gưl wưng thŭn 2021 – 2026, Khua bruă kƀĭn ala Vương Đình huệ mtă srăng mkŏ mjing hlue hdră tianăn mtam lehanăn online hŏng 63 boh čar, ƀuôn prŏng. Klei bi kƀĭn năng ai srăng mkŏ mjing hlăm hrue 15/7/2021./.

Y Khem pô mblang