VOV4.Êđê-  Aguah mbruê, klei bi kƀĭn êpul hgŭm Nghị viện dŭm ala čar ASEAN tal 42 hŏng akŏ “Mđĭ kyar klei bi mguôp nghị viện hlăm hdră mrô kluôm ênŭm, mđing truh êpul êya ASEAN thŭn 2025” klă klơ̆ng dưi kčưm pŏk ti gŭ klei gĭt gai mơ̆ng khua kiă kriê IAPA, khua kiă kriê êpul hgŭm čih mkra klei bhiăn Brunei Darussalam Pehin Dato Abdul Rahman Taib hŏng êlan online. Êpul bi ala gưl dlông Việt Nam mơ̆ng khua bruă kƀĭn ala Vương Đình Huệ ba anăp nao hgŭm hlăm klei kƀĭn IAPA tal 42 ti anôk bi kƀĭn Hà Nội, Việt Nam.

Tui si hdră êlan mă bruă, ti aguah, klei bi kƀĭn mâo lu mta phŭn yuôm bhăn, kñăm bi trông kơ dŭm boh klei tar rŏng lăn lehanăn alŭ wăl, tui hluê anăn dưi mđĭ bruă klam mơ̆ng klei bi mguôp lu tĭng lehanăn klei hgŭm mguôp, sa ai hlăm ASEAN. Yap yuôm bhăn dŭm klei gĭr mơ̆ng ASEAN lehanăn dŭm ala čar hlăm bruă mdrơ̆ng hŏng klei ruă tưp Covid-19 lehanăn klei kčĕ mơ̆ng Việt Nam kơ bruă bi mguôp vaccine.

Y Bel pô mblang