VOV4.Êđê - Aguah 30-6, ti ƀuôn prŏng Ƀuôn Ama Thuôt, čar Dak Lak mkŏ mjing klei bi kƀĭn, Êpul gơ̆ng bruă ƀuôn sang gưl X, wưng thŭn 2021-2026. Khua bruă kƀĭn ala Vương Đình Huệ nao hlăm klei mphŭn pŏk klei bi kƀĭn.

Hlăm klei bi kƀĭn anei, Knơ̆ng bruă ruah khua čar Dak Lak bi mklă 75 čô bi ala Êpul gơ̆ng bruă ƀuôn sang čar gưL X, wưng păn bruă 2021-2026, mbĭt anăn, ruah Y Vinh Tơr - K’iăng Khua anôk bruă Êpul gơ̆ng bruă ƀuôn sang čar Dak Lak gưl 9 ngă Khua Êpul gơ̆ng bruă ƀuôn sang čar hŏng ênoh hră mplĕ mâo 98,66%. Ruah Phạm Ngọc Nghị, Khua Knơ̆ng bruă sang čư̆ êa čar Dak Lak wưng thŭn 2016-2021 lŏ djŏ ngă Khua knơ̆ng bruă sang čư̆ êa čar Daklak thŭn 2021 - 2026 hŏng ênoh hră mplĕ mâo 100%.

Blŭ hrăm hlăm anôk bi kƀĭn, Khua bruă kƀĭn ala Vương Đình Huệ mñă klă, phung bi ala Êpul gơ̆ng bruă ƀuôn sang brei mđĭ lar klei bi hmô, jhŏng mĭn, jhŏng ngă, jhŏng klam bruă mơ̆ng pô bi ala mâo mnuih ƀuôn sang ruah, boh nik klei thâo mprăp, mbruă, gĭr mlih mrâo hlăm bruă ktuê dlăng, ksiêm dlăng, êmuh, bi tuôm hŏng phung bi ala kơ mnuih ƀuôn sang, drông mnuih ƀuôn sang, mguôp klei blŭ mkŏ mjing hdră bhiăn. Khua bruă kƀĭn ala Vương Đình Huệ mtă, hlăm wưng 2021-2026, Êpul gơ̆ng bruă ƀuôn sang čar Dak Lak gưl X brei lŏ dơ̆ng mlih mrâo, mđĭ hnơ̆ng jăk leh anăn tŭ dưn hĭn, lŏ dơ̆ng ba Dak Lak jing sa hlăm dŭm anôk mâo bruă duh mkra đĭ kyar, mâo klei iêu jăk, lar bra hlăm krĭng bruă duh mkra krĭng Lăn Dap Kngư.

H Zawut  pô mblang