VOV4.Êđê- Giăm 146 êklai prăk jing ênoh prăk dưi iêu mkrum mơ̆ng Keh ala ƀuôn mâo ai tiê kmah đru kơ phung dleh dlan  hlăm Knăm pŏk ngă klei čih “Jih jang mnuih ƀuôn sang đru gang mkhư̆ klei ruă Covid-19 leh anăn pŏk ngă hdră “vaccin kơ jih jang mnuih mă bruă” mrâo dưi pŏk ngă tlam hruê 3-6 hlăm Êpul hgŭm mnuih mă bruă Việt Nam. Hdră bruă kñăm iêu mthưr, iêu jak dŭm gưl mnuih ƀuôn sang đru mguôp prăk tăk kơ hdră gang mkhư̆ klei ruă Covid-19, iêu jak klei găl ala ƀuôn sang kơ mnuih ƀuôn sang, hlăm anăn mâo mnuih mă bruă dưi tlŏ vaccin hnưm hĭn. Ênoh prăk đru mơ̆ng klei iêu jak leh anăn Hdră bruă srăng dưi ba yua kơ hdră gang mkhư̆ klei ruă Covid-19, hlăm anăn mđing tal êlâo kơ bruă blei vaccin kơ phung dưi dưn, ƀun ƀin, mnuih mă bruă, đru ktuê dlăng klei ruă tưp, răng mgang klei suaih pral, êđăp ênang kơ mnuih ƀuôn sang. Blŭ hrăm ti knăm pŏk ngă, Khua Bruă kƀĭn ala Vương Đình Huệ mtă kơ dŭm anôk bruă djŏ tuôm ngă klă mngač dŭm ênoh dưi hrui mă, yua djŏ hdră kñăm, tŭ dưn djŏ hdră bhiăn čiăng mâo klei tŭ dưn hlăm hdră gang mkhư̆ klei ruă Covid-19.

Pô mblang: H’Zawut Ƀuôn Yă