VOV4.Êđê- Hrue mbrue (6/9), ti adŭ bruă duh mkra mnia mblei ala čar Austria, ƀuôn prŏng phŭn Vien mkŏ mjing leh klei trông čhai phung duh mkra Việt nam – Austria mâo Anôk bruă bi ala knŭk kna Việt Nam, Phŭn bruă čuăn mkă duh bi liê lehanăn Adŭ bruă duh mkra mnia mblei Austria mđrăm mbĭt mkŏ mjing. Lu phung duh mkra Việt Nam lehanăn pô bi ala mơ̆ng êbeh 20 phung duh mkra hlăm dŭmbru ngăn prăk, knơ̆ng prăk, bruă mdrao mgŭn, bruă kčĕ đru, bruă êlan klông, bruă êdeh êdâo, kdrăp kơ bruă răng mgang klei êđăp ênang, răng mgang klei pui ƀơ̆ng, mghaih msir djah djâo, bi kjăp mta msei hjei, klei duh mkra mnia mblei, hdră bhiăn, bruă êdeh phiơr, bruă pui kmlă nao ti anôk trông čhai. Blŭ hrăm ti anôk bi trông, Khua bruă kƀĭn ala Vương Đình Huệ mñă, Việt Nam čang hmăng jih jang phung duh kmkra Austria, Adŭ bruă duh mkra mnia mblei mâo klei blŭ mtrŭt čiăng bi leh klei bhiăn kuôl kă bruă duh bi liê. Ară anei, Austria mâo 37 mta bruă hŏng ênoh duh bi liê jih jang hlăm brô 150 êklăk dolar, lu jing hlăm bruă mkra mjing, lehanăn bruă kreh knhâo. Klei bi mguôp bruă mnia mblei, Austria jing sa anôk duh mkra mnia mblei yuôm bhăn mơ̆ng Việt Nam, lehanăn ară anei hlăk dôk hlăm 5 anôk Việt Nam čhĭ mnơ̆ng kơ ala tač êngao prŏng êdi ti EU. Khua Bruă kƀĭn ala Vương Đình Huệ ăt čang hmăng, phung duh mkra Austria sa ai čiăng kơ knŭk kna Austria đru mkăp brei vaccine, kdrăp mdrao mgŭn, đru kơ Việt Nam gang mkhư̆ klei ruă tưp./.

Pô mblang: Y-Khem Niê