VOV4.Êđê- Ti ƀuôn prŏng phŭn Viên, ala čar Austria, khua bruă kƀĭn ala Vương Đình Huệ mâo leh klei bi tuôm 6 čô khua bi ala knŭk kna Việt Nam ti Ơrôp mâo: Khua bi ala ti Seck; ti Slovakia; ti Hungary; ti Balan; ti Austria hlŏng klam jing pô bi ala ti Slovania lehanăn khua bi ala ti Đức. Hlăm klei bi tuôm anei, phung khua bi ala mâo leh klei hâo mdah kluôm kơ mnuih Việt Nam hlăm dŭm ala čar anăn. Năng mđing hĭn êdi jing klei ruă tưp ti Ơrôp hlăk đĭ tưp ktang thŭn 2020, snăn lu mnuih Việt Nam pô tuôm hŏng lu klei dleh dlan hlăm klei duh ƀơ̆ng. Phung khua bi ala mâo mơh klei đru lehanăn mđĭ ai phung ƀuôn sang pô dôk găn hlăm klei ruă tưp, jih ai tiê bi mguôp kơ keh vaccine gang mkhư̆ klei ruă tưp covid 19, bi đru kơ phung ƀuôn sang dôk găn klei yan adiê ngă. Phung dôk ti ala čar Seck mâo đru leh truh 1 êklai 500 êklăk prăk kơ keh vaccine, phung ƀuôn sang ti Đức đru 50 êbâo Euro. Khua Bruă kƀĭn ala Vương Đình Huệ mtă kơ jih jang phung khua bi ala lŏ dơ̆ng gĭr hŏng jih ai tiê, duah djăp êlan đru kơ klei dưi blei vaccine gang mkhư̆ klei ruă tưp Covid 19./.

Pô mblang: Y-Khem Niê