VOV4.Êđê- Tlam mmăt hruê 8/6, ti sang bruă kƀĭn ala, Khua bruă kƀĭn ala Vương Đình Huệ mâo leh klei blŭ hrăm êlan đĭng blŭ hŏng aduôn Valentina Matvienko, khua êpul hgŭm ala čar Nga. Khua bruă kƀĭn ala Vương Đình Huệ lehanăn khua kiă kriê êpul hgŭm Liên bang Nga Valentina Matvienko bi lač, hruê mmông leh êgao, klei mjĕ giăm bruă kđi čar plah wah 2 ala čar mâo klei bi kjăp lehanăn đĭ kyar jăk hlăm jih bruă hlăm Đảng, knŭk kna ăt msĕ hŏng dŭm alŭ wăl, knơ̆ng bruă lehanăn dŭm êpul êya yang ƀuôn 2 ala čar. 2 čô khua gĭt gai bi mñă klă, khădah dôk hlăm wưng klei ruă tưp Covid-19 hmăi amâo jăk kơ bruă duh mkra dŭm ala čar, ƀiădah klei bi mguôp hlăm bruă duh mkra, mnia mblei, duh bi liê Việt Nam - Nga mâo klei mlih hriê kơ jăk.

Ƀri wưng anei, khua bruă kƀĭn ala Vương Đình Huệ mâo klei lač jăk kơ ala čar Nga mđŭp brei leh kơ ala čar Việt Nam 1.000 hnơ̆ng vaccine Sputnik V mơ̆ng akŏ thŭn anei lehanăn mrâo anei mâo leh klei ƀuăn srăng đru kơ ala čar Việt Nam dưi nao jĕ 20 êklăk hnơ̆ng vaccine Sputnik V, mñă klă ala čar Việt Nam hmănh hmưi lŏ bi mguôp hŏng ala čar Nga kơ bruă ba jao kdrăp mkra mjing Việt Nam gang mkhư̆ klei ruă tưp Covid-19 ti ala čar Việt Nam.

Pô mblang: Y-Ƀel Êban