VOV4.Êđê – Tlam mmăt mbruê 23/7, ti Sang bruă kƀĭn ala, Bruă kƀĭn ala gưl 15 mkŏ mjing leh knăm bi êdah lehanăn jao klei bi mklă mơ̆ng Bruă kƀĭn ala, dhar bruă kƀĭn ala bruă mă kơ knuă druh. Blŭ hlăm knăm anăn,  khua bruă kƀĭn ala Vương Đình Huệ mñă klă, leh 2 hruê hlăm klei kƀĭn tla 1 bruă kƀĭn ala gưl 15, jih jang phung mă bruă hlăm bruă kbĭn ala dưi čuăn ruah lehanăn bi mklă leh.

Khua bruă kƀĭn ala hmăng hmưi dŭm dhar bruă, anôk bruă, hrăm mbĭt lŏ rơ̆ng kjăp dŭm boh tŭ dưn dưi mâo leh mơ̆ng bruă kƀĭn ala, lehanăn lŏ mlih mrâo, mđĭ hnơ̆ng ngă bruă mơ̆ng bruă kƀĭn ala. Khua bruă kƀĭn ala Vương Đình Huệ lač, čiăng kơ knŭk kna ênuah ênô snăn êlâo hĭn Bruă kƀĭn ala ăt ênuah ênô mơh, ngă bruă kyua mnuih ƀuôn sang, boh nĭk hlăm bruă mkra mjing klei bhiăn ala čar, ksiêm dlăng, mđĭ kyar ala čar. Mtă kơ khua gĭt gai êpul hgŭm bruă djuê ana, dŭm anôk bruă, dhar bruă kƀĭn ala hrăm mbĭt ngă dŭm hdră mkăp, hdră êlan dưi jao leh, pral mkŏ mjing hdră mlih mrâo mŏng tur knơ̆ng jar klei bhiăn mâo Bruă kƀĭn ala mtrŭn leh.

Y Ƀel pô mblang