VOV4.Êđê- Aguah mbrue (3/6), ti sang bruă kƀĭn ala, Khua bruă kƀĭn ala Vương Đình Hụê mâo leh klei bi blŭ hrăm trực tuyến hŏng khua bruă kƀĭn ala Campuchia Samdek Heng Somrin. Ti anôk bi blŭ hrăm, dua khua bruă kƀĭn ala bi myuôm dŭm boh tŭ dưn leh mâo hlăm klei bi mguôp dua nah jăk siam wưng leh êgao. Êjai dôk găn klei ruă tưp covid 19, Khua gĭt gai dua ala čar lŏ dơ̆ng bi tuôm, bi blŭ hrăm, trông čhai nanao hdră êlan bi hgŭm, mđĭ hĭn klei bi mguôp bruă duh mkr amnia mblei, kñăm mâo klei đĭ kyar hơĭt, 4 mlan akŏ thŭn 2021, klei bi mnia mblei dua nah đĭ giăm 3 êklai 900 êklăk dolar, jing 122% mkă hŏng wưng anei thŭn dih, đru bi krŭ leh bruă duh mkra dua ala čar, mđĭ kyar klei hdĭp phung ƀuôn sang. Dua khua bruă kƀĭn ala bi tŭ ư, hlăm klei bi mguôp lu tĭng, bruă kƀĭn ala dua ala čar mâo nanao klei bi mpŭ, lehanăn bi sa ai hlăm dŭm anôk bi kƀĭn lu tĭng msĕ si IPU, Êpul hgŭm bruă kƀĭn ala dlông rŏng lăn, klei bi kƀĭn prŏng bruă kƀĭn ala Ngŏ Dhŭng Châu Á, klei bi kƀĭn dŭm ala car blŭ klei Prăng, klei bi kƀĭn phung ngă bruă kƀĭn ala Châu Á, lehanăn Châu Á – Thái Bình Dương./.

Pô mblang: Y-Khem Niê