VOV4.Êđê -  Tlam mmăt hruê 12/7, ti Anôk bruă kƀĭn ala, Khua bruă kƀĭn ala Vương Đình Huệ mâo leh hdră bi trông online hŏng Khua bruă kƀĭn ala Hungary László Kövér. Khua bruă kƀĭn ala Vương Đình Huệ bi mni dŭm klei đĭ kyar jăk siam hlăm klei bi mjĕ dua ala čar wưng leh êgao, mñă klă Việt Nam bi myuôm lehanăn čang hmăng dưi mđĭ hĭn klei bi mjĕ, bi hgŭm hlăm djăp mta ra bruă hŏng Hungary – jing ƀĭng hgŭm phŭn kluôm dhuôm mơ̆ng Vịêt Nam ti krĭng Krah – Ngŏ Ơrôp. Khua bruă kƀĭn ala Vương Đình Huệ mñă, Việt Nam mprăp ngă kdrông mkŏ kơ Hungary pŏk mlar klei bi hgŭm hŏng lu ala čar hlăm krĭng Ngŏ Dhŭng Asi, Việt Nam čang hmăng kơ Hungary lŏ dơ̆ng đru, mtrŭt mđĭ hĭn klei bi mjĕ plah wah Việt Nam hŏng dŭm ala čar hlăm Êpul hgŭm Ơrôp ăt msĕ mơh dŭm ala čar hlăm krĭng wăl. Ti anôk bi trông, dua Khua bruă kƀĭn ala mñă srăng mâo dŭm klei bhiăn bi hgŭm hluê hŏng klei bi kƀĭn mơ̆ng Dhar bruă bi hgŭm mlir knŭk kna mkŏ mjing hlăm mlan 10 ti anăp, boh nik mtrŭt mđĭ hdră bi hgŭm hlăm bruă hâo hưn ênuk mrâo, bruă hâo hưn êlan kbưi; Lŏ dơ̆ng đru, kah mbha klei thâo hlăm bruă čih mkra klei bhiăn, ksiêm dlăng hdră ngă bruă mơ̆ng anôk bruă knŭk kna./.

H Nêč pô mblang