VOV4.Êđê - Ngă bruă bi tuôm hŏng phung bi ala leh klei bi kƀĭn tal sa, Bruă kƀĭn ala gưl 15, aguah mbrue (5/8), Khua bruă kƀĭn ala Vương Đình Huệ lehanăn êpul bi ala bruă kƀĭn ala ƀuôn prŏng Hải Phòng mâo leh klei bi tuôm hŏng phung bi ala kơ mnuih ƀuôn sang hlue hdră bi kƀĭn online hlăm jih jang dŭm boh kdriêk, wăl krah ti ƀuôn prŏng Hải Phòng mâo mkŏ leh hŏng êbeh 200 anôk mkŏ lehanăn 5 êbâo cô bi ala nao bi kƀĭn. Sa ai hŏng klei hâo mdah mơ̆ng boh tŭ dưn klei bi kƀĭn, phung bi ala bi lač, klei bi kƀĭn tal sa, Bruă kƀĭn ala gưl 15 klă sĭt hlue ngă leh djŏ hŏng klei mĭng mơ̆ng khua gĭt gai Hồ Chí Minh jing "leh hŏng djăp mta, mâo lu êlan dưi mdrơ̆ng" Bruă kƀĭn ala ngă leh bruă hŏng klei knhăk, păn kjăp djăp boh klei, hlăm bruă đua klam, hlăm klei lŏ thiăm mbŏ hdră mtrŭn ti anôk bi kƀĭn tal sa, hŏng dŭm bruă ngă ka tuôm găn ôh, jao kơ knŭk kna, khua knŭk kna dŭm bruă ngă djŏ hŏng klei bhiăn kñăm kiă kriê jăk hĭn hlăm bruă mdrơ̆ng hŏng klei ruă tưp. Wĭt lač klei phung ƀuôn sang ênuh kơ bruă mđĭ kyar bruă hiu čhưn ênguê, lehanăn duh mkra hlăm bruă êa ksĭ ti Bạch Long Vĩ lehanăn Cát Bà, Khua bruă kƀĭn ala Vương Đình Huệ lač, bruă anei jing yuôm bhăn truh hŏng bruă răng mgang ala car, kơ klei êđăp ênang, snăn bi mguôp bruă duh mkra êa ksĭ hŏng bruă răng mgang ala čar, răng mgang wăl hdĭp mda, anôk hing ang yuôm hin anei./.

Y Khem pô mblang