VOV4.Êđê- Tlam mbruê 21/6, ti sang bruă kƀĭn ala, khua bruă kƀĭn ala Vương Đình Huệ mâo leh klei bi trông online hŏng khua gĭt gai Hạ Viện Nhật Bản Oshima Tadamori. Khua bruă kƀĭn ala Vương Đình Huệ lŏ sa blư̆ mñă klă, Việt Nam dlăng kơ ala čar Nhật Bản jing ƀĭng hgŭm bi mguôp hdră êlan yuôm bhăn tal êlâo hĭn, sui thŭn lehanăn mâo klei đăo knang hlăm hdră êlan hŏng tač êngao mơ̆ng Việt Nam.

Sa ai hŏng ala čar Nhật Bản dưi bi lar bruă klam jing ala čar mdrŏng sah tar rŏng lăn, đru mguôp prŏng hlăm klei êđăp ênang, mđĭ kyar alŭ wăl lehanăn tar rŏng lăn. Hlăm klei bi trông anăn, 2 tĭng mâo klei tŭ ư mtrŭt mjhar klei jĕ giăm lehanăn bi mguôp phung khua êmua 2 ala čar, boh nĭk jing phung khua êmua mda asei, phung khua êmua mniê, êpul khua êmua ƀĭng hgŭm. Lŏ mđĭ klei mjĕ giăm kơ mnuih ƀuôn sang 2 ala čar hlăm bruă mkŏ mjing klei nao bi čuă dŭm alŭ wăl 2 ala čar mơ̆ng phung khua êmua 2 tĭng, mă bruă, mđĭ bruă duh bi liê, hưn mdah rup, klei găl bruă čhưn ênguê lehanăn kah mbha bruă dhar kreh ti ala čar Việt Nam.

Pô mblang: Y-Khem Niê