VOV4.Êđê- Tlam hruê 14/7, ti Anôk bruă kƀĭn ala, Khua bruă kƀĭn ala Vương Đình Huệ drông leh Pô bi ala Philippines Meynardo Los Banos Montealegre hriê kkuh čhưn. Blŭ hrăm ti knăm anei, Khua bruă kƀĭn ala Vương Đình Huệ akâo kơ Pô bi ala Philippines hlăm wưng păn bruă mơ̆ng pô lŏ mtrŭt mđĭ hĭn bruă pŏk ngă dŭm hdră bi hgŭm phŭn plah wah bruă kƀĭn ala Việt Nam hŏng Thượng viện lehanăn Hạ viện Philippines; mđing truh kơ bruă bi mklă klei kuôl kă plah wah dua anôk bruă kƀĭn ala mjing tur knơ̆ng kơ hdră bi hgŭm, năng djŏ hŏng klei bi mjĕ ƀĭng hgŭm phŭn kluôm dhuôm plah wah dua ala čar lehanăn klei bi mjĕ, hgŭm bruă jăk siam plah wah dua anôk bruă kƀĭn ala. Djŏ tuôm kơ bruă răng mgang klei êđăp ênang krĭng Êa ksĭ Ngŏ lehanăn klei êđăp ênang bruă dŭ mdiăng êlan êa, Khua bruă kƀĭn ala Vương Đình Huệ sa ai hŏng klei blŭ mơ̆ng Pô bi ala brei mđĭ hdră bi blŭ hrăm, đru kčĕ, tŭ ư hŏng klei mĭn hdơ̆ng găp kơ bruă Êa ksĭ Ngŏ hkuê si klei bhiăn bi tŭ ư leh mơ̆ng ASEAN< hluê ngă djăp ênŭm lehanăn tŭ dưn DOC mbĭt anăn bi hgŭm kjăp hlăm hdră bi trông COC hluê hŏng bruă mpŭ kơ hdră bhiăn quốc tế, boh nik Klei kuôl kă mơ̆ng Êpul hgŭm lu ala čar kơ Hdră bhiăn Êa ksĭ thŭn 1982./.

Pô mblang: H’Nêč Êñuôl