VOV4.Êđê- Tlam mbruê 13/6, ti sang bruă kƀĭn ala, khua bruă kƀĭn ala Vương Đình Huệ gĭt gai leh klei mă bruă hŏng êpul khua êmua dŭm boh klei yang ƀuôn, dŭm anôk bruă mơ̆ng bruă kƀĭn ala kơ bruă đru kơ mnuih mă bruă luič bruă mă lehanăn dŭm čô mnuih mâo klei hmăi mơ̆ng klei ruă tưp Covid-19. Leh hmư̆ klei blŭ mơ̆ng dŭm čô hlăm anôk bruă kƀĭn ala, knŭk kna, khua bruă kƀĭn ala Vương Đình Huệ lač, êpul khua êmua dŭm boh klei yang ƀuôn srăng tui ngă dŭm hdră mtrŭn mơ̆ng bruă kƀĭn ala lehanăn knŭk kna hlăm dŭm êpul gơ̆ng bruă ƀuôn sang dŭm alŭ wăl.

Mbĭt anăn mtă kơ knŭk kna srăng hnưm bi mklin boh tŭn dưn klei čih yap lehanăn mâo dŭm klei đru kơ dŭm čô mnuih mâo klei hmăi amâo jăk kyua klei ruă tưp Covid-19. Čiăng đru bruă dưi ngă mâo boh tŭ dưn hdră êlan mđĭ kyar bruă duh mkra- ala ƀuôn lehanăn hdră êlan đru kơ dŭm čô mnuih mâo klei hmăi amâo jăk kyua klei ruă tưp Covid-19, khua bruă kƀĭn ala Vương Đình Huệ mñă klă, knŭk kna srăng hnưm mâo dŭm hdră êlan mđĭ kyar, mtrŭt mjhar prăk brei čan duh bi liê hlăm hruê mmông ti anăp. Lŏ dơ̆ng mgaih msir wăl mnia mblei, mđĭ kyar bruă duh mkra êngao knŭk kna, bruă duh mkra mrô lehanăn mđĭ klei čiăng yua hlăm ala čar, hmar tui ngă hdră mtrŭn mơ̆ng klei kƀĭn kluôm Đảng tal 13 hlăm klei hdĭp.

Pô mblang: Y-Ƀel Êban