VOV4.Êđê - Tlam mbruê 10-6, Khua bruă kƀĭn ala Vương Đình Huệ nao čhưn leh anăn mă bruă ti Sang êa drao bi hriăm aê mdrao kahan. Blŭ hrăm hlăm mmông mă bruă, Khua bruă kƀĭn ala Vương Đình Huệ bi mni klei gĭr ktưn leh anăn klei tŭ mơ̆ng Sang hră bi hriăm aê mdrao kahan dưi mâo hlăm 72 thŭn mkŏ mjing leh anăn đĭ kyar.

Boh nik, hlăm bruă gang mkhư̆ klei ruă Covid-19, Sang hră bi hriăm aê mdrao kahan thâo pral, gĭr, tŭ dưn hlăm hlăm wưng êgao. Khua bruă kƀĭn ala Vương Đình Huệ mtă kơ Sang hră bi hriăm aê mdrao kahan kƀĭn ngă bi jăk dŭm boh phŭn msĕ si: mđing bi hriăm êpul thâo mbruă hluê hdră dưi ngă bruă, ñŭ kma hŏng klei kreh knhâo mrâo mrang leh anăn bruă mjuăt bi hriăm mrâo mrang dlông rŏng lăn; lŏ dơ̆ng hyuă kjăp bruă kriê dlăng leh anăn mđĭ hnơ̆ng jăk mdrao mgŭn, bi lu jơr dŭm mta ksiêm mkă mdrao mgŭn, mă mnuih ruă jing phŭn, bi mguôp tliêr kjăp plah wah mdrao mgŭn hŏng ksiêm hriăm kreh knhâo leh anăn mjuăt bi hriăm.

H Zawut pô mblang