VOV4.Êđê- Tlam hruê 5/9, khua Bruă kƀĭn ala Vương Đình Huệ lehanăn êpul bi ala gưl dlông Việt Nam truh leh ti tač êdeh phiơr Schwechat, ƀuôn prŏng phŭn Viên, ala čar Austria nao hgŭm klei bi trông phung khua Bruă kƀĭn ala tar rŏng lăn, nao čuă lehanăn mă bruă hŏng Nghị viện châu Âu (EP), ala čar Bỉ, lehanăn klă klơ̆ng nao čuă ala čar Phần Lan. Tui si hdră mâo leh, leh truh kơ Austria, khua bruă kƀĭn ala Vương Đình Huệ nao bi tuôm, blŭ hrăm hŏng knuă druh bi ala Việt Nam ti Austria. Pô bi ala êpul êya mnuih Việt Nam hlăm dŭm ala čar Austria, Séc, Hungary, Slovakia. Anei dưi yap jing sa klei bi tuôm yuôm bhăn mơ̆ng khua bruă kƀĭn ala Vương Đình Huệ hŏng mnuih ƀuôn sang Việt Nam ti ala čar tac êngao. Nao hgŭm klei kƀĭn trông phung khua kiă kriê tar rŏng lăn tal 3, hlăm dŭm klei kƀĭn, khua bruă kƀĭn ala Vương Đình Huệ mâo klei blŭ yuôm bhăn djŏ hŏng klei jing lehanăn hdră êlan mơ̆ng Việt Nam. Êngao kơ anăn, phung bi ala gưl dlông mơ̆ng Bruă kƀĭn ala Việt Nam ăt srăng nao hgŭm hlăm klei bi trông djŏ tuôm hŏng dŭm mta phŭn msĕ si: răng mgang wăl hdĭp mda, mlih mrô, klei mtăp mdơr êkei mniê, jao klei dưi kơ phung mniê lehanăn hđeh êdam êra, klei bhiăn tar rŏng lăn lehanăn lu boh klei tar rŏng lăn mkăn.

Êngao klei kƀĭn, khua bruă kƀĭn ala Vương Đình Huệ lŏ bi tuôm 2 nah hŏng khua bruă kƀĭn ala dŭm ala čar, mâo dŭm ƀĭng hgŭm bi mguôp kluôm ênŭm ăt msĕ hŏng ƀĭng hgŭm kjăp hŏng Việt Nam. Anei jing mmông găl čiăng hâo hưn klei hmăng hmưi mơ̆ng Việt Nam kơ phung khua gĭt gai dŭm ala čar, čiăng lŏ mtrŭt mđĭ klei jing ƀĭng hgŭm mâo leh mơ̆ng êlâo, bi mguôp lu mta hlăm bruă duh mkra, mnia mblei, duh bi liê, klei kreh knhâo, mtô mjuăt, mnêč ngă bruă, lehanăn mđĭ klei bi mguôp nghị viện hŏng dŭm ala čar.

Pô mblang: Y-Ƀel Êban