VOV4.Êđê - Aguah mbruê 29/7, ti sang bruă khua lăn čar, khua lăn čar Nguyễn Xuân Phúc tŭ drông leh khua phŭn bruă lĭng kahan Mi Lloyd Austin dôk mâo klei hriê čuă čhưn ala čar Việt Nam tui si klei iêu jak mơ̆ng Đại tướng Phan Văn Giang, khua phŭn bruă lĭng kahan Việt Nam. Bi ala kơ knŭk kna lehanăn mnuih ƀuôn sang Việt Nam, khua lăn čar Nguyễn Xuân Phúc mâo leh klei lač jăk kơ ala čar Mi kyua mâo klei đru lu hlăm vaccine gang mkhư̆ klei ruă tưp Covid-19, yap yuôm bhăn klei blŭ hrăm plah wah 2 čô khua phŭn bruă lĭng kahan 2 ala čar Mi - Việt Nam. 2 tĭng mâo leh klei bi tŭ ư kơ lu mta phŭn hlăm klei bi mguôp yuôm bhăn dŭm hruê mmông kơ anăp. Khua phŭn bruă lĭng kahan Mi Lloyd Austin ăt mñă klă, ala čar Mi srăng mtrŭt mđĭ hĭn klei bi mguôp hŏng Việt Nam mgaih msir dŭm klei hmăi kyua klei bi blah. Tui hluê anăn ngă na nao bruă mkŏ mjing, bi kjăp klei đăo knang 2 ala čar.

Drông khua phŭn bruă lĭng kahan Mi Lloyd Austin, Khua knŭk kna bi mni kơ klei hriê čuă čhưn ala čar Việt Nam mơ̆ng khua phŭn bruă lĭng kahan Mi, hmăng hmưi lŏ mtrŭt đi klei bi mguôp kluôm ênŭm 2 ala čar, mâo klei jăk kơ 2 ala čar, kyua klei êđăp ênang, hơĭt kjăp lehanăn đĭ kyar hlăm alŭ wăl, tar rŏng lăn. Khua knŭk kna mñă klă bruă bi mguôp mđĭ kyar bruă duh mkra 2 ala čar dôk mâo lu klei  găl dưi đĭ kyar, mñă kơ dŭm tĭng lŏ bi mguôp hĭn hlăm hruê mmông kơ anăp, boh nĭk mtrŭt đĭ dŭm bruă ngă klei klei găl mơ̆ng ala čar Mi msĕ si: bruă mkŏ mkra, êlan klông, mnuih mă bruă, pui kmlă doh…

Y Bel pô mblang