VOV4.Êđê - Aguah mbruê (16/8) ti Hà Nội, Êpul khua kiă kriê bruă mặt trận čar kwar gưl dlông Việt Nam lehanăn dŭm êpul bruă mkŏ mjing klei bi kƀĭn online hlăm kluôm ala hlue ngă hdră mă bruă mơ̆ng hdră mtrŭn klei bi kƀĭn prŏng Đảng 13. Nao lehanăn blŭ hrăm gĭt gai klei bi kƀĭn, Khua gĭt gai Đảng Nguyễn Phú Trọng mñă, čiăng mâo ngă jăk bruă čuăn, mta kñăm phŭn mơ̆ng hdră mtrŭn anei, amâo lŏ mâo êlan mkăn ôh jing bi dưn yua jih ai ktang klei bi mguôp jih jang djuê ana, mbĭt hŏng ai ktang ênuk ară anei hlăm klei kiă kriê kjăp mơ̆ng Đảng.

Khua gĭt gai Đảng Nguyễn Phú Trọng mtă kơ anôk bruă mặt trận čar kwar gưl dlông Việt Nam lehanăn dŭm êpul bruă djŏ tuôm lŏ dơ̆ng mđĭ hĭn klei mkŏ mjing, lehanăn bi kjăp klei bi mguôp jih jang djuê ana, dưn yua jih ai tiê klei mĭn mbruă mơ̆ng jih jang phung ƀuôn sang, boh nik dưn yua jih ai ktang mrâo hlăm phung ƀuôn sang. Mbĭt anăn mđing truh kơ klei mĭn, lehanăn klei tŭ dưn sĭt êmĭt kơ phung ƀuôn sang./.

Y Khem pô mblang