VOV4.Êđê- Tlam mbruê, ti sang bruă Đảng gưl dlông, khua gĭt gai Đảng Nguyễn Phú Trọng mâo leh klei blŭ hrăm êlan đĭng blŭ hŏng khua mil čhil Hàn Quốc Moon Jea In. khua mil čhil Hàn Quốc Moon Jea In lač klă, yap yuôm bhăn klei jĕ giăm hŏng ala čar Việt Nam, mñă klă Việt Nam jing ƀĭng hgŭm yuôm bhăn hlăm hdră êlan krĭng dhŭng đĭ kyar mơ̆ng Hàn Quốc. Lŏ brei thâo, Hàn Quốc srăng lŏ đru kơ ala čar Việt Nam hlăm bruă gang mkhư̆ klei ruă tưp Covid-19, hmăng hmưi 2 ala čar lŏ bi mguôp hĭn hlăm bruă duh mkra, bruă hŏng tač êngao, klei êđăp ênang. Čiăng hnưm ba bruă mnia mblei 2 ala čar truh kơ 100 êklai USD, dưi mđĭ klei êrô êbat 2 ala čar truh kơ sa hnơ̆ng mrâo čiăng mđing truh kơ klei bi hdơr 30 thŭn hruê mkŏ mjing klei mjĕ giăm 2 ala čar ti thŭn 2022.

Dua čô khua gĭt gai bi tŭ ư lŏ pŏk phai klei bi mguôp 2 ala čar hlăm dŭm bruă ngă, bi hmar klei bi mguôp hlăm bruă gang mkhư̆ klei ruă tưp Covid-19, bi êlam hĭn klei mjĕ giăm 2 Đảng, bruă kƀĭn ala lehanăn ênuk hđeh gưl mrâo 2 ala čar, mkŏ mjing atur kjăp kơ klei mjĕ giăm mnuih ƀuôn sang 2 ala čar lŏ đĭ kyar hĭn.

Pô mblang: Y-Ƀel Êban