VOV4.Êđê- Hrue mbrue (24/8), ti anôk bruă Đảng gưl dlông, Khua gĭt gai Đảng Nguyễn Phú Trọng kiă kriê leh klei bi kƀĭn hŏng phung khua kiă kriê knơ̆ng kơ bruă mdrơ̆ng hŏng klei ruă tưp Covid 19. nao ti anôk bi kƀĭn anei mâo wăt khua lăn čar Nguyễn Xuân Phúc, Khua knŭk kna Phạm Minh Chính, Khua bruă kƀĭn ala Vương Đình Huệ, Khua knơ̆ng kiă kriê êpul bruă   gưl dlông Võ VănThưởng, Đại tướng Tô Lâm, Khua phŭn bruă kahan ksiêm. Ti anôk mă bruă, Khua gĭt gai Đảng Nguyễn Phú Trọng lač, anei jing sa klei bi kƀĭn mjêč êjai dôk găn klei ruă tưp prŏng. Khua gĭt gai Đảng bi mni kơ êpul ngă bruă mdrao mgŭn tal êlâo, lĭng kahan, kahan ksiêm, dŭm phŭn dhar bruă, alŭ wăl lehanăn jih jang bruă kđi čar pral trŭn hlăm bruă, hŏng klei gĭr jih hnơ̆ng ksiêm dlăng klei ruă tưp, mâo leh lu phung ƀuôn sang sa ai. Khădah snăn, Khua gĭt gai Đảng ăt bi êdah mơh dŭm klei awăt êdu, klei mtŭk mtŭl, tơl mâo đa đa alŭ wăl adôk lĕ hlăm klei amâo lŏ mđing ôh hlăm bruă mdrơ̆ng hŏng klei ruă tưp, brei mâo ai tiê êđăp ênang, amâo mâo klei kdjăt kƀla, Khua gĭt gai Đảng mtă kơ knŭk kna, dŭm phŭn dhar bruă alŭ wăl lŏ dơ̆ng bi tĭng mkă, hlue ngă hŏng klei mđrăm, jih hnơ̆ng, mbha bruă bi jăk, djŏ bruă klam kơ jih jang čiăng dưi ksiêm dlăng gang mkhư̆ klei ruă tưp hŏng klei tŭ dưn hlăm wưng kơ anăp./.

Pô mblang: Y-Khem Niê