VOV4.Êđê - Khua gĭt gai Đảng Nguyễn Phú Trọng mâo leh asăp iêu mthưr kơ jih jang mnuih, lĭng kahan hlăm kluôm ala, lehanăn phung ƀuôn sang hdĭp kơ ala tač êngao kơ bruă mdrơ̆ng hŏng klei ruă tưp Covid 19. Hlăm hră čih: “Ară anei, klei ruă tưp covid 19 hlăk dleh dưi ksiêm dlăng, hnơ̆ng tưp lar pral, ba klei amâo mâo jăk kơ klei hdĭp phung ƀuôn sang, hmăi amâo mâo jăk prŏng êdi hŏng klei duh mkra ala ƀuôn lehanăn kơ djăp mta hlăm klei hdĭp. Hŏng ai tiê “Mdrơ̆ng hŏng klei ruă tưp msĕ si bi kdơ̆ng hŏng roh”, răng mgang klei suaih pral, răng mgang klei hdĭp phung ƀuôn sang jing tal êlâo hĭn, bi ala kơ Đảng, lehanăn lăn čar, kâo jih ai tiê iêu mthưr kluôm Đảng, jih jang phung ƀuôn sang, lĭng kahan lehanăn phung ƀuôn sang drei hdĭp kơ ala tač êngao, drei hlăk dôk gĭr leh, lehanăn lŏ bi gĭr hĭn, bi mguôp leh, lŏ bi mguôp hĭn, jih djuê ana jih jang mnuih sa ai tiê mbĭt hŏng Đảng, knŭk kna dŭm gưl, djăp dhar bruă duah djăp hdră gang mkhư̆, msưh kdŭn amâo mâo lui klei ruă tưp đĭ lêč hlăm yang ƀuôn. Kâo mtă kơ dŭm gưl bruă Đảng, bruă sang čư̆ êa, êpul kiă kriê bruă mdrơ̆ng hŏng klei ruă tưp mơ̆ng nah dlông hlŏng kơ nah gŭ bi jih hnơ̆ng hlăm klai kiă kriê, ktuh êyuh jih hrue mmông mdrơ̆ng hŏng klei ruă tưp, ngă bruă hŏng klei mbruă, lehanăn mâo klei tŭ dưn.

Kâo đăo knang, hlăm kluôm ala bi mguôp, kluôm Đảng, jih jang phung ƀuôn sang sa ai, lehanăn ngă bruă mâo klei đru mbĭt mơ̆ng puhng ƀuôn sang drei mơ̆ng ala tač êngao, lehanăn mah jiăng ala tač êngao sĭt nik drei srăng dưi mkhư̆ gang klei ruă tưp covid 19, lehanăn brei ngă bi dưi, kñăm đru hrăm mbĭt hŏng klei gĭt hlăm tar rŏng lăn čiăng kơ jih jang anak mnuih mâo klei êđăp ênang, hnŭk êngiê, bi hgŭm mbĭt mdrŏng sah đĭ kyar bi năng hŏng klei hjŏng ktang kdrăm k’ah kơ lăn car drei, djuê ana drei!./.

Y Khem pô mblang