VOV4.Êđê - Hruê mbruê, Khua gĭt gai Đảng Nguyễn Phú Trọng mâo leh klei blŭ hrăm êlan đĭng blŭ hŏng khua bruă Đảng ƀuôn prŏng Hồ Chí Minh Nguyễn Văn Nên čiăng bi trông kơ bruă gang mkhư̆. Khădah ka amâo nao truh ti ƀuôn prŏng Hồ Chí Minh ôh, ƀiădah dŭm hruê êgao Khua gĭt gai Đảng Nguyễn Phú Trọng mâo klei uêñ mĭn na nao kơ klei ruă tưp ti ƀuôn prŏng Hồ Chí Minh ăt msĕ hŏng dŭm čar krĭng dhŭng. Khua gĭt gai Đảng Nguyễn Phú Trọng mâo leh klei êmuh kña, bi mđĭ ai kơ bruă Đảng, bruă sang čư̆ êa lehanăn mnuih ƀuôn sang ti ƀuôn prŏng Hồ Chí Minh dôk gĭr jih ai mdrơ̆ng hŏng klei ruă tưp Covid-19 mâo êbeh leh 2 mlan hŏng anei. Khua gĭt gai Đảng čih yap yuôm bhăn lehanăn mâo klei mni kơ dŭm čô mâo klei bi hmô jăk hlăm êpul ba anăp, amâo uêñ kơ asei pô, klei dleh dlan kyua čiăng răng mgang klei hdĭp mnuih ƀuôn sang. Mbĭt anăn Khua gĭt gai Đảng Nguyễn Phú Trọng mâo klei lač jăk kơ mnuih ƀuôn sang, phung mă bruă mdrao mgŭn, dŭm gưl bruă, êpul êya knơ̆ng bruă, pô mâo ai tiê kmah… bi mguôp lehanăn dôk bi mguôp hŏng bruă Đảng, bruă sang čư̆ êa, mnuih ƀuôn sang ti ƀuôn prŏng hrăm mbĭt mdrơ̆ng hŏng klei ruă tưp. Khua gĭt gai Đảng Nguyễn Phú Trọng lŏ sa blư̆ mñă kơ ƀuôn prŏng Hồ Chí Minh lŏ mâo klei gĭr hĭn, bi mguôp hĭn hlăm djăp mta bruă.

Y Ƀel pô mblang