VOV4.Êđê - Tŭ ư klei iêu jăk mơ̆ng êpul khua gĭt gai gưl dlông Đảng Cộng Sản Trung Quốc, mmăt mbruê (6/7), khua gĭt gai Đảng Nguyễn Phú Trọng ba anăp êpul bi ala gưl dlông mơ̆ng Đảng Cộng Sản Việt Nam nao hgŭm hlăm klei kƀĭn trông gưl dlông online plah wah Đảng Cộng Sản Trung Quốc hŏng dŭm Đảng dlông rŏng lăn. Klei kƀĭn trông anei mâo akŏ “Kyua klei mơak mñai kơ mnuih ƀuôn sang, bruă klam mơ̆ng Đảng”, mâo klei nao hgŭm hlăm brô 10 êbâo čô pô bi ala mơ̆ng 500 Đảng lehanăn êpul êya tar rŏng lăn. Bruă Trung Quốc iêu jak Khua gĭt gai Đảng Nguyễn Phú Trọng nao hgŭm lehanăn blŭ hlăm klei kƀĭn trông bi êdah klei dlăng yuôm bhăn, k’hưm dlông rŏng lăn mơ̆ng Đảng lehanăn knŭk kna Việt Nam, klei jĕ giăm Việt Nam - Trung Quốc.

Boh nik bruă Khua gĭt gai Đảng Nguyễn Phú Trọng nao hgŭm lehanăn mâo klei blŭ hlăm klei bi trông anăn ăt bi êdah klei yap yuôm bhăn mơ̆ng Đảng drei hŏng Đảng Cộng Sản Trung Quốc, klei jĕ giăm plah wah 2 Đảng, 2 ala čar Việt Nam - Trung Quốc, bi êdah Đảng cộng sản Việt Nam yap jing yuôm bhăn nanao bruă hŏng tač êngao tui si klei mtăp mđơr, bi mpŭ hdơ̆ng pô, mâo nanao klei bi mguôp hŏng dŭm Đảng, dŭm ala čar hlăm dŭm bruă mbĭt dlông rŏng lăn.

Y Ƀel pô mblang