VOV4.Êđê - Hruê mbruê 11/8, ti anôk bruă knŭk kna, mkŏ mjing leh klei kƀĭn online tar ala čar tal êlâo mơ̆ng knŭk kna wưng păn bruă 2021-2026, tui ngă hdră mtrŭn mơ̆ng klei kƀĭn kluôm Đảng tal 13 lehanăn hdră mtrŭn mơ̆ng bruă kƀĭn ala gưl 15 kơ bruă mđĭ mkar bruă duh mkra ala ƀuôn 5 thŭn wưng thŭn 2021-2025. Khua gĭt gai Đảng Nguyễn Phú Trọng nao hgŭm lehanăn mâo klei blŭ gĭt gai klei kƀĭn.

Khua gĭt gai Đảng lač klă, klei kƀĭn kluôm tal 13 mơ̆ng Đảng mâo leh klei tŭ jing jăk siam, bi tŭ ư mâo hdră êlan mkŏ mkra, mđĭ kyar lehanăn răng mgang ala čar, hlăm anăn mâo hdră êlan mđĭ kyar bruă duh mkra - ala ƀuôn 5 thŭn wưng thŭn 2021-2025. Čiăng ngă mâo klei dưi dŭm bruă kñăm, bruă klam mâo leh êlâo anăn, Khua gĭt gai Đảng mtă, knŭk kna wưng păn bruă 2021-2026 čiăng lŏ bi lar ktang hĭn, jăk hĭn knhuah gru kdrưh k’ang, dŭm boh tŭ dưn dưi mâo lehanăn dŭm klei hriăm mơ̆ng knŭk kna dŭm wưng păn bruă dưi mâo leh, mâo klei gĭr hĭn hlăm êlan bi mlih, mđĭ hnơ̆ng jăk, klei dưi, boh tŭ dưn dŭm bruă ngă hlăm wưng mđĭ kyar mrâo.

Y Bel pô mblang