VOV4.Êđê- Aguah mbrue (20/7), khua gĭt gai Đảng Nguyễn Phú Trọng mbĭt hŏng phung khua kiă kriê Đảng, knŭk kna nao hlăm knăm pŏk klei bi kƀĭn tal sa, bruă kƀĭn ala gưl 15, mâo mkŏ mjing leh kdrăm k’ah ti adŭ bi kƀĭn Diên Hồng hlăm ƀuôn prŏng Hà Nội, blŭ hrăm ti anôk bi kƀĭn, Khua gĭt gai Đảng Nguyễn Phú Trọng mtă, Bruă kƀĭn ala lŏ dơ̆ng dưn yua jih bruă klam pô hlăm klei mkŏ mjing hdră bhiăn hlăm djăp mta bruă kơ lăn čar, ngă bruă čuăn mđĭ kyar duh mkra ala ƀuôn, răng mgang kjăp klei êđăp ênang, lehanăn bruă hŏng ala tač êngao.

Hŏng klei pral lehanăn bi mâo klei kjăp mâo mtrŭn djăp mta hră mơar djŏ hŏng hdră bhiăn, pral dưi jing anôk mkŏ mjing hdră bhiăn kjăp, djăp ênŭm, rơ̆ng dưi mâo hnơ̆ng kjăp, bi năng hŏng klei jing sĭt. Jing anôk bruă prŏng hĭn mơ̆ng lăn čar yang ƀuôn ngă phŭn Việt Nam, Khua gĭt gai Đảng mtă kơ bruă kƀĭn ala dưn yua bi jih klei găl, klei mưng leh hlăm bruă knuă mơ̆ng 75 thŭn êgao, lŏ dơ̆ng mlih mrâo, mđĭ hĭn hnơ̆ng kjăp lehanăn klei tŭ dưn bruă knuă, bi năng hŏng bruă kđi čar lăn čar pô wưng mrâo mrang./.

Pô mblang: Y-Khem Niê