VOV4.Êđê - Trần Hồng Tiến, Khua dlăng bruă Đảng kdriêk Krông Pač, čar Dak Lak brei thâo: kdriêk mrâo mâo sa čô mnuih jing khua gĭt gai wăl krah Phước An djŏ klei ruă Covid-19. Anăn jing N.V.H, Khua gĭt gai Đảng wăl krah Phước An. Mơ̆ng bruă ksiêm dlăng klei ruă, hlăm wưng mơ̆ng hruê 6 truh hruê 12/10, H nao ti lu anôk leh anăn bi tuôm hŏng lu mnuih. Leh H mâo klei tŭ test pral djŏ kman SARS-CoV-2, anôk bruă djŏ tuôm ƀuh leh anăn bi mklă mâo êbeh 50 čô mnuih jing F1.

Hlăm anăn, lu jing phung knuă druh, mnuih mă bruă knŭk kna mơ̆ng wăl krah Phước An leh anăn knuă druh kdriêk Krông Pač. Klei tŭ Test pral leh anăn ksiêm mkă hŏng hdră Realtime RT-PCR mơ̆ng 50 čô F1 djŏ tuôm kơ H amâo djŏ ôh kman SARS-CoV-2.  Phung anei ară anei dôk bi ktlah hjăn ti anôk mă bruă čiăng rơ̆ng bi leh bruă ngă mơ̆ng wăl krah.

H  Zawut pô mblang