VOV4.Êđê- Hruê 19/7 mbruê, leh mă bruă hŏng ƀuôn prŏng Hà Nội, Khua knŭk kna Phạm Minh Chính gĭt gai leh Klei bi kƀĭn mjêč mŏng knŭk kna hŏng Anôk bruă ala čar gĭt gai hdră gang mkhư̆ klei ruă Covid 19 čiăng hmư̆ klei hưn mthâo kơ klei ruă tưp, mŏng anăn ksiêm dlăng, bi mklă dŭm hdră msir kjăp ktang hĭn ti anăp klei mâo dleh dưi ksiêm dlăng mơ̆ng klei ruă ară anei.

Mphŭn pŏk klei bi kƀĭn, Khua knŭk kna Phạm Minh Chính brei dŭm klei blŭ bi trông hưn mdah klă nik boh klei dôk mâo djŏ tuôm kơ hdră gang mkhư̆ klei ruă tưp ară anei, anăn jing hdră kiă kriê, gĭt gai, hyuă kjăp bruă buah mkra hlăm bruă mkŏ mjing hluê ngă, tĭng dlăng mnuih mă bruă, phung nai aê mdrao, phung mă bruă mdrao mgŭn, phung ksiêm dlăng kman, anôk bruă mkăp kdrăp mnơ̆ng yua, rơ̆ng mâo djăp mnơ̆ng dhơ̆ng yua hlăm aguah tlam kơ mnuih ƀuôn sang; bruă găn êrô, dŭ mdiăng mnơ̆ng dhơ̆ng; hluê ngă hdră đru kơ yang ƀuôn, boh nik hŏng mnuih luič bruă mă, đru kơ mnuih tuôm hŏng klei dleh dlan; Hdră mtrŭn mrô 68 brei thiăm mbŏ hlei mnuih? Dŭm klei gun kpăk kơ bruă ngăn prăk si srăng msir mghaih?... Mơ̆ng anăn čiăng bi tŭ ư lehanăn ba mdah dŭm hdră msir tŭ dưn hĭn, djŏ hŏng klei mâo sĭt hlăm boh klei dôk mâo mjêč ară anei./.

Pô mblang: H’Nêč Êñuôl