VOV4.Êđê- Khua knŭk kna Phạm Minh Chính mrâo brei Phŭn bruă mdrao mgŭn gĭt gai, bi hgŭm hŏng anôk bruă djŏ tuôm lehanăn Anôk bruă sang čư̆ êa čar Thanh Hóa mjêč ksiêm dlăng, bi mklă boh klei, mta phŭn klei truh leh tlŏ vaccine gang mkhư̆ Covid 19 ti Thanh Hóa. Klei truh anei mâo ti Anôk bruă mkra hdruôm jơ̆ng, jep guôk Kim Việt, kdriêk Nông Cống, čar Thanh Hóa hruê 23/11, ngă 4 čô djiê leh tlŏ vaccine gang mkhư̆ Covid 19. Khua knŭk kna mtă kơ anôk bruă ksiêm dlăng bi mklă boh klei anei, mă klei hriăm lehanăn hưn mdah hŏng Khua knŭk kna êlâo kơ hruê 30/11. Khua knŭk kna mtă kơ Phŭn bruă mdrao mgŭn bi hgŭm kjăp hŏng dŭm Phŭn, dhar bruă, alŭ wăl hluê ngă djŏ klei dưi, bruă klam mâo kčah jao rơ̆ng kjăp mnơ̆ng dhơ̆ng, anôk bruă nah gŭ, klei găl kriê pioh vaccine gang mkhư̆ Covid 19 djŏ hdră, tŭ đua klam bruă mkŏ mjing hdră tlŏ vaccine gang mkhư̆ Covid 19 êđăp ênang, kreh knhâo, tŭ dưn hlăm kluôm ala čar./.

Pô mblang: H’Nêč Êñuôl