VOV4.Êđê – Ƀri gưl Khua knŭk kna Phạm Minh Chính mâo Bruă kƀĭn ala gưl 15 ruah ngă Khua knŭk kna ala čar yang ƀuôn ngă phŭn Việt Nam, Khua knŭk kna ala mtao Campuchia Samdech Techo Hun Sen mâo leh hră hơêč hmưi. Hlăm hră, Khua knŭk kna Hun Sen bi mklă: bruă Phạm Minh Chính lŏ mâo Bruă kƀĭn ala Việt Nam gưl XV ruah ngă Khua Knŭk kna ala čar yang ƀuôn ngă phŭn Việt Nam wưng thŭn 2021-2026 bi êdah klei đaŏ knang mơ̆ng Đảng, Knŭk kna leh anăn yang ƀuôn Việt Nam hŏng klei duh myơr mơ̆ng Khua knŭk kna kyua sa lăn čar Việt Nam mdrŏng sah, mrâo mrang ti gŭ klei gĭt gai klă mngač mơ̆ng Đảng Cộng sản Việt Nam. Khua knŭk kna Hun Sen bi êdah klei hơ̆k mơak kơ klei đĭ kyar mơ̆ng klei bi hgŭm dua ala čar hlăm wưng êgao hluê si ai tiê ala čar riêng gah jăk siam, bi hgŭm, bi thâo săng hnơ̆ng găp leh anăn hdơ̆ng mâo klei tŭ dưn, bi mklă čang hmăng bi hgŭm tliêr kjăp hŏng Khua Knŭk kna Phạm Minh Chính hlăm wưng kơ anăp.

H Zawut pô mblang