VOV4.Êđê- Hruê 3/6, ti Anôk bruă knŭk kna, ti gŭ klei gĭt gai mơ̆ng Khua Knŭk kna Phạm Minh Chính, Knŭk kna bi kƀĭn grăp gưl mlan 5/2021. Hlăm klei bi kƀĭn anei, Knŭk kna hmư̆ klei hưn mdah leh anăn bi trông kơ bruă gang mkhư̆ klei ruă Covid-19, lač kơ bruă duh mkra- ala ƀuôn, prăk knŭk kna 6 mlan akŏ thŭn 2021 leh anăn dŭm hdră msir hlăm 6 mlan knhal jih thŭn 2016-2020 leh anăn mĭn tĭng Hdră kčah duh bi liê knŭk kna man dưn wưng thŭn 2021-2025.

Blŭ hrăm mphŭn pŏk Klei bi kƀĭn, Khua Knŭk kna Phạm Minh Chính bi mklă, klei bi kƀĭn Knŭk kna grăp gưl mlan 5 mkŏ mjing hlăm boh klei ruă tưp Covid-19 dleh ktuê dlăng, hnơ̆ng tưp lar lu, pral hĭn, mta mrâo huĭ hyưt hĭn leh anăn tưp lar hlăm dŭm wăl tuh tia mkra mjing, anôk kkuh mpŭ. Khua Knŭk kna mtă kơ phung bi ala nao hlăm klei bi kƀĭn bi trông dŭm bruă hlăm ai tiê: mĭn bi sĭt, blŭ sĭt, ngă sĭt, klei tŭ dưn, mnuih ƀuôn sang hluê ngă sĭt. Mơ̆ng năn lač djŏ kơ boh klei, kčah dŭm hdră msir hluê ngă tŭ dưn dŭm bruă klam hlăm wưng kơ anăp.

Pô mblang: H’Zawut Ƀuôn Yă