VOV4.Êđê- Aguah mbruê, ti Hà Nội mkŏ mjing leh kƀĭn trông bi mguôp boh blŭ kơ hdră mkăp hưn mdah bi mklin hdră mtrŭn mrô 19-NQ/TW mơ̆ng klei kƀĭn tal 6, êpul khua êmua gưl dlông gưl 11 kơ bruă bi mlih mrâo hdră êlan, klei bhiăn ala čar kơ bruă yua lăn ala hlăm wưng mđĭ ktang klei mlih mrâo kluôm ênŭm, jing gru kruăk truh kơ thŭn 2020 ala čar jing sa ala čar mâo bruă tuh tia đĭ kyar mrâo mrang. Blŭ pŏk kčưm klei kƀĭn trông, khua knŭk kna Phạm Minh Chính, khua êpul gĭt gai, mñă klă: Leh giăm 10 thŭn tui ngă hdră mtrŭn mrô 19 NQ/TW, drei dưi mâo leh lu boh tŭ dưn yuôm bhăn hlăm bruă bi lar ai dưi mơ̆ng lăn ala kơ bruă mđĭ kyar bruă duh mkra - ala ƀuôn, đru bi mguôp hlăm klei mtăp mđơr lehanăn hơĭt kjăp yang ƀuôn, bruă lĭng kahan, klei êđăp ênang, răng mgang wăl hdĭp mda lehanăn mdrơ̆ng hŏng klei mlih yan adiê.

Khădah, êjai dôk ngă bruă ăt mâo lu klei awăt êdu. Kyua anăn, êpul phung khua êmua ba mdah leh klei bi klă mkŏ mjing êpul gĭt gai bi mklin 10 thŭn tui ngă hdră mtrŭn mrô 19 NQ/TW. Khua knŭk kna mtă kơ phung bi ala kñăm bi trông kơ dŭm boh tŭ dưn dưi mâo leh, dŭm klei ka dưi ngă, klei kƀah lehanăn phŭn agha hlăm klei tui ngă hdră mtrŭn mrô 19 NQ/TW, boh nik jing dŭm mta phŭn mơ̆ng pô.

Pô mblang: Y-Ƀel Êban