VOV4.Êđê- hruê mbruê, khua knŭk kna Phạm Minh Chính gĭt gai leh klei kƀĭn online ala čar kơ bruă čuăl mkă. Khua knŭk kna mtă kơ dŭm čô khua êmua, khua bruă sang čư̆ êa dŭm čar dôk ngă klei bi kbưi yang ƀuôn srăng lŏ ngă jăk klei anăn, dŭm čar amâo ngă ôh klei bi kbưi yang ƀuôn srăng đru mnuih mă bruă kơ dŭm čar krĭng dhŭng, boh nik mđĭ klei thâo hlăm bruă dŏng mdrao.

Khua knŭk kna iêu mthưr kơ jih jang alŭ wăl mđĭ ai tiê “thâo khăp, thâo pap”, pah mni dŭm alŭ wăl đru bi mguôp leh mnơ̆ng dhơ̆ng kơ dŭm čar, ƀuôn prŏng krĭng nah dhŭng. Blŭ hlăm klei kƀĭn anăn, khua knŭk kna Phạm Minh Chính mtă kơ dŭm phŭn, dhar bruă srăng hmư̆ boh blŭ mơ̆ng dŭm alŭ wăl lehanăn alŭ wăl srăng hmư̆ klei blŭ mơ̆ng dŭm phŭn, dhar bruă čiăng hrăm mbĭt ngă bruă čuăl mkă. Bruă čuăl mkă čiăng dưi nao êlâo sa knhuang, čuăl mkă kluôm ênŭm, bi klă klei ƀhiăn čuăl mkă mơ̆ng bruă kƀĭn ala, thâo klă klei găl mơ̆ng alŭ wăl, phŭn, dhar, knơ̆ng bruă čiăng dưi đĭ kyar kjăp. Mâo klei čuăl mkă jăk keh srăng mâo hdră mkăp jăk, mâo pô duh bi liê, yua jih hnơ̆ng klei duh bi liê bruă mbĭt, mđĭ kyar bruă duh mkra ala ƀuôn mâo klei tŭ dưn.

Pô mblang: Y-Ƀel Êban