VOV4.Êđê -.Aguah mbruê (17/8), khua knŭk kna Phạm Minh Chính gĭt gai leh klei knŭk kna bi kƀĭn kơ klei bhiăn ala čar mlan 8 thŭn 2021. Blŭ hlăm klei kƀĭn anăn, khua knŭk kna Phạm Minh Chính lač klă, tui ngă hdră mtrŭn mơ̆ng klei kƀĭn kluôm Đảng tal 13, hdră êlan ngă bruă mơ̆ng knŭk kna, bruă klam 6 mlan, kñăm ngă bi jăk 3 klei kdưn hlăm hdră êlan, 6 bruă klam kñăm, 12 bruă klam hlăm wưng păn bruă anei, hlăm anăn mâo wăt bruă mkŏ mjing klei bhiăn kiă kriê. Khua knŭk kna mtă, dŭm čô khua phŭn bruă bi lar ktang ai tiê bruă klam kyua mnuih ƀuôn sang, kyua lăn čar, kñăm kơ klei gĭt gai, kiă kriê kluôm ênŭm bruă ngă, kñăm mkŏ mjing klei bhiăn kiă kriê, 3 klei kdlưn hlăm hdră êlan. Ti anôk dôk mâo klei kpăk gun srăng lŏ wĭt ksiêm dlăng, mgaih msir tui si klei bhiăn mơ̆ng Đảng, knŭk kna. Leh mâo klei bi tŭ ư srăng ngă tui si klei bhiăn hŏng klei êngiê, ênoh ƀiă gưt kơ ênoh lu, sa čô gưt kơ êpul lu mnuih, čiăng mâo sa klei blŭ. Ti anôk, grăp mmông mâo nanao klei bi mguôp, pô ba anăp đua bruă klam. Boh phŭn jing mâo klei sa ai, bi mguôp lehanăn bi tŭ ư.

Y Bel pô mblang