VOV4.Êđê- Ti anôk bi kƀĭn trực tuyến kluôm ala kơ boh klei, hdră mjêč gang mkhư̆, mdrơ̆ng hŏng klei ruă Covid 19 mkŏ mjing hruê 29/5, Khua knŭk kna Phạm Minh Chính mñă klă leh ai tiê iêu mthưr kluôm, mjêč kơ hdră gang mkhư̆, mdrơ̆ng hŏng klei ruă. Boh nik, Khua knŭk kna mñă klă kơ dŭm Phŭn, dhar bruă brei ruh mtlaih klei dleh dlan, gun kpăk kơ alŭ wăl hluê ai tiê 3 amâo mâo; amâo mâo kƀah prăk kơ hdră gang mkhư̆, mdrơ̆ng hŏng klei ruă; amâo dưi lač kƀah êa drao gŭn, mnơ̆ng yua, kdrăp mnơ̆ng kơ hdră gang mkhư̆, mdrơ̆ng hŏng klei ruă; amâo lač kƀah klei bhiăn, hdră mtrŭn kơ hdră gang mkhư̆, mdrơ̆ng hŏng klei ruă.

Lač kơ boh klei ară anei, đa đa alŭ wăl ăt adôk mâo lu klei dleh dlan, klei ruă tưp dleh ktuê dlăng hĭn msĕ si Bắc Ninh, Bắc Giang leh anăn sa kdrêč Hà Nội, mrâo anei hĭn jing ti ƀuôn prŏng Hồ Chí Minh.  Hĭn mơh, mta kman mrâo tal anei huĭ hyưt, dleh ktuê dlăng hĭn. Mâo klei tưp lar mơ̆ng êpul êya kơ wăl tuh tia mkra mjing leh anăn mklăk wĭt, mâo klei tưp lar mơ̆ng anôk lu mnuih, anôk kkuh mpŭ. Khua knŭk kna mñă klă kơ klei gĭt gai mkŏ mjing hluê ngă kluôm ênŭm, jăk hĭn, tŭ dưn; mgaih msir klei dleh dlan kơ klei bhiăn, hdră êlan, gun kpăk mơ̆ng dŭm phŭn, dhar bruă. Ngă bi jăk hlăm hdră dưi mâo vaccin. Mă klei ksŭng ngă jing phŭn. Khua knŭk kna mñă klă, hlăm wưng kơ anăp, bruă ngă hdră kñăm răng mgang klei suaih pral klei hdĭp mnuih ƀuôn sang ăt jing yuôm bhăn hĭn, boh nik mkhư̆, msưh kdŭn klei ruă tưp boh nik hlăm dŭm alŭ wăl phŭn msĕ si Bắc Giang, Bắc Ninh, boh nik hlăm dŭm krĭng tuh tia mkra mjing leh anăn ƀuôn prŏng Hồ Chí Minh. Klei mĭn gĭt gai jing lŏ dơ̆ng “mdrơ̆ng hŏng klei ruă tưp msĕ si bi kdơ̆ng hŏng phung roh”.

“Mmông anei ksŭng ngă kluôm ênŭm, jih klei găl, ai ktang, tŭ dưn hĭn hlăm jih jang bruă kđi čar leh anăn jih jang yang ƀuôn hŏng klei gĭt hĭn, prŏng hĭn, ngă bruă jih ai tiê hĭn, tŭ dưn hĭn, hur har hĭn, mâo boh phŭn, čuăl krĭng msưh kdŭn klei ruă tưp hơĭt kjăp boh klei pral hĭn. Brei drei lŏ dơ̆ng păn kjăp klei đaŏ knăl boh klei, mguôp bi jăk djŏ guôp klei tŭ dưn gang mkhư̆ leh anăn ksŭng ngă, ƀiădah brei ksŭng ngă jing phŭn, gang mkhư̆ klei ruă tưp, jing hdră kluôm, bi ksŭng ngă jing êdah kdlưn, brei hlŏng ngă mtam yơh. Amâo ngă ngơi mang luič klei răng tơdah mâo klei ruă tưp, ƀiădah đăm huĭ hyưt rŭng răng ôh, tơdah luič klei răng, kƀah klei gĭr, kƀah klei thâo sĭt mâo klei ruă tưp srăng ba truh mâo klei bi mklă amâo djŏ guôp, amâo tŭ dưn.”

Khua knŭk kna mtă hyuă kjăp klei bhiăn, hŏng klei mĭn mbruă hlăm hdră gang mkhư̆ klei ruă tưp, mđĭ ktang bruă ksiêm dlăng, mbha klei dưi, ênưih ktuê dlăng, ksiêm dlăng. Ngă êjai mă klei hriăm êjai, mbŏ hdră ngă mbruă, tŭ dưn. Dlăng myuôm bruă hâo hưn mtô mblang, iêu jak mnuih ƀuôn sang, ai tiê mnuih ƀuôn sang hluê ngă hrăm mbĭt, bi trông, hrăm mbĭt dưn klei tŭ mdrơ̆ng hŏng klei ruă tưp. Grăp čô mnuih brei čŏng răng mgang pô, răng mgang êpul êya, kyua klei tŭ dưn ala čar, djuê ana.

Kơ dŭm bruă klam hdră msir phŭn, Khua Knŭk kna mñă klă, brei ktuê dlăng boh klei, pral, hmao ba dŭm hdră mtrŭn, hdră êlan, hdră msir klă klơ̆ng. Khua Knŭk kna lač klă, êlâo hĭn jao kơ K’iăng Khua Knŭk kna Vũ Đức Đam gĭt gai mbĭt mta bruă; K’iăng Khua knŭk kna Trương Hòa Bình ktuê dlăng gĭt gai ti ƀuôn prŏng Hồ Chí Minh. K’iăng khua knŭk kna Lê Văn Thành gĭt gai krŭ wĭt bruă mkra mjing, mnia blei dua čar Bắc Ninh, Bắc Giang jing alŭ wăl tuh tia mkra mjing. Ti Hà Nội, Khua bruă Đảng ƀuôn prŏng Hà Nội Đinh Tiến Dũng gĭt gai. Dŭm anôk bruă brei mbha bruă bi klă mngač, tŭ dưn. Ngă êjai mă klei hriăm êjai. Amâo brei mâo klei amâo răng êlâo, mtŭk mtŭl.

 “Dŭm phŭn bruă brei hmao ruh mgaih klei dleh dlan kơ dŭm alŭ wăl hŏng klei blŭ “tlâo klei đăm ngă”: đăm lač ôh kƀah prăk, đăm lač ôh kƀah mnuih mă bruă, êa drao gŭn kdrăp mdrao gun, đăm lač ôh amâo mâo klei bhiăn, hdră êlan kơ bruă gang mkhư̆ klei ruă tưp. Tơdah êgao klei dưi snăn brei hưn mthâo hŏng Knŭk kna.”

          Khua Knŭk kna mtă, brei gang mkhư̆ mơ̆ng kbưi, mơ̆ng hnưm êlâo kơ bluh mâo klei ruă tưp hŏng 5 klei mtă + vaccin; ba yua dŭm hdră mrâo mrang hlăm klei hiu duah, ktuê dlăng êđăp ênang covid, bi kdơ̆ng hŏng phung amâo hluê ngă…; gang mkhư̆ hnưm, thâo ƀuh hnưm, ngă bi ktlah pral, mdrao mgŭn jăk, pral hơĭt kjăp boh klei mâo. Ktuê dlăng tliêr kjăp klei mŭt kbiă leh anăn dôk soh hŏng hdră bhiăn. Kơ klei hluê ngă hdră êlan vaccin, Khua knŭk kna mñă klă brei ngă hŏng djăp klei dưi čiăng mâo vaccin:

 “Tar rŏng lăn ară anei čiăng sơaĭ kơ vaccin snăn srăng dleh dlan kơ drei dưi mâo vaccin ƀiădah amâo djŏ snăn ôh êdu ai. Brei duah djăp hdră; brei gĭr ngă mkra hlăm ala čar; duah kdrăp mkra mjing. Hâo hưn kơ klei mkŏ mjing tlŏ vaccin hluê si klei dăp mđing tal êlâo kơ dŭm êpul, anôk mâo klei ruă tưp. Hlak mblang bi klă čiăng kơ mnuih ƀuôn sang tlŏ vaccin kyua anei jing hdră gang mkhư̆ jăk hĭn. Iêu mkrum djăp klei găl djŏ hdră bhiăn kơ hdră gang mkhư̆ klei ruă tưp, boh nik blei vaccin. Khua knŭk kna iêu mthưr djăp anôk bruă, alŭ wăl, anôk bruă mnia blei, mnuih ƀuôn sang đru mguôp prăk, klei thâo, hdră ngă bruă čiăng dưi blei vaccin. Lŏ dơ̆ng mkŏ mjing Keh vaccin Covid-19.”

Kơ bruă hâo hưn mtô mblang, Khua Knŭk kna mñă klă brei đru kơ mnuih ƀuôn sang thâo săng hdră êlan mơ̆ng Đảng, hdră bhiăn mơ̆ng knŭk kna djŏ tuôm kơ hdră gang mkhư̆ klei ruă tưp. Bi ktrâo lač čiăng kơ mnuih ƀuôn sang mbĭt hŏng bruă kđi čar, gưl bruă Đảng, bruă sang čư̆ êa ngă bruă, bi đru klam klei dleh dlan, mđĭ ai mnuih ƀuôn sang đaŏ knang hlăm bruă ngă mơ̆ng Đảng, knŭk kna; iêu mkrum ai ktang mnuih ƀuôn sang đru mguôp kơ bruă anei hŏng hdră kñăm kluôm ênŭm, tŭ dưn.

 Khua knŭk kna mñă klă, brei mđĭ lar klei jăk, klei thâo mprăp, klei mĭn mbruă mơ̆ng gưl bruă Đảng, bruă sang čư̆ êa dŭm gưl hŏng klei mĭn mbruă mơ̆ng mnuih ƀuôn sang. Dŭm phŭn, dhar bruă, alŭ wăl brei ngă pral, mjêč, tŭ dưn. Khua Knŭk kna čang hmăng leh anăn đaŏ knang, hŏng klei đru mguôp mơ̆ng jih jang ƀuôn sang, drei srăng ngă tŭ jing hdră gang mkhư̆ klei ruă tưp./.

Pô mblang: H’Zawut Ƀuôn Yă