VOV4.Êđê - Tlam mbruê 28/6, ti sang bruă kƀĭn ala, khua bruă kƀĭn ala Vương Đình Huệ mâo leh klei bi tuôm hŏng khua gĭt gai Đảng, khua lăn čar Lào Thongloun Sisoulith. Khua gĭt gai Đảng, khua lăn čar Lào Thongloun Sisoulith lehanăn khua bruă kƀĭn ala Vương Đình Huệ bi lač sơăi, klei hriê čuă mơ̆ng khua gĭt gai Đảng, khua lăn čar Lào jing klei bi mklă klei jing ƀĭng hgŭm, klei bi mguôp prŏng lehanăn kluôm ênŭm plah wah Việt Nam - Lào. Ti anăp klei ruă tưp Covid-19 dôk dleh dưi ksiêm dlăng hlăm alŭ wăl. Việt Nam lač jing yuôm dŭm hdră êlan gang mkhư̆ klei ruă tưp Covid-19 dôk ngă ti ala čar Lào, lehanăn lŏ mñă klă, ala čar Lào srăng hnưm dưi ksiêm dlăng klei ruă tưp, lŏ dưi ngă bi leh hdră mtrŭn mơ̆ng klei kƀĭn kluôm tal 11 mơ̆ng Đảng mnuih ƀuôn sang cách mạng Lào. Khua gĭt gai Đảng, khua lăn čar Lào Thongloun Sisoulith mñă klă, hlăm hruê mmông kơ anăp, bruă kƀĭn ala 2 ala čar čiăng lŏ mâo lu hĭn klei bi trông, kah mbha, mđĭ bruă bi mguôp, kah mbha klei thâo, boh nĭk hlăm bruă mkŏ mjing klei kiă kriê, klei bhiăn ala čar lehanăn klei ksiêm dlăng gưl dlông dŭm bruă ngă mơ̆ng dŭm anôk bruă knŭk kna. Lŏ mđĭ hĭn klei bi mguôp plah wăl dŭm dhar bruă kƀĭn ala 2 ala čar hlăm bruă ksiêm dlăng dŭm klei kuôl kă bi mguôp 2 ala čar.

Tlam 28-6, ti Anôk bruă knŭk kna, Khua knŭk kna Phạm Minh Chính bi tuôm hŏng Khua gĭt gai Đảng, khua lăn čar Cộng hòa Dân chủ Nhân dân Lào Thongloun Sisoulith dôk hriê čhưn klă sĭt ti Việt Nam. Khua gĭt gai Đảng, Khua lăn čar Thongloun Sisoulith bi êdah klei hơ̆k mơak lŏ hriê ti Việt Nam hlăm bruă mrâo, hơêč hmưi kơ klei tŭ dưn prŏng prĭn, kluôm ênŭm yang ƀuôn Việt Nam mâo leh hlăm hdră mđĭ kyar bruă duh mkra - ala ƀuôn leh anăn ñŭ kma quốc tế hlăm dŭm thŭn êgao. Dua khua gĭt gai bi trông kơ boh klei leh anăn bi mni kơ dŭm hdră msir mdrơ̆ng hŏng klei ruă Covid-19 hlăm grăp ala čar hlăm wưng êgao. Khă gơ̆ hmaĭ kyua klei ruă Covid-19, dua tĭng ăt gĭr ktưn mđĭ lar bi trông êpul leh anăn gưl dlông, mđĭ lar klei tŭ dưn dŭm klei bhiăn bi hgŭm dua nah hlăm dŭm gưl; bi hgŭm hlăm dŭm mta bruă klei êđăp ênang, răng mgang ala čar, bruă duh mkra, êlan klông, sang hră mtô bi hriă, bi hgŭm plah wah dŭm alŭ wăl lŏ dơ̆ng đĭ kyar; prăk hrui wĭt mnia blei dua nah 5 mlan akŏ thŭn 2021 mâo giăm 571 êklăk USD, đĭ giăm 40% mkă hŏng wưng anei thŭn 2020, ară anei Việt Nam mâo 208 hdră bruă duh bi liê ti Lao dôk dưi dưn yua hŏng ênoh prăk bi liê 5 êklai 1 êtuh 60 êklăk USD.

 Y Ƀel lehanăn H Zawut pô mblang