VOV4.Êđê - Aguah mbrue (29/8), khua knŭk kna Phạm Minh Chính, Khua êpul ala čar kiă kriê bruă gang mkhư̆ klei ruă tưp Covid 19, kiă kriê leh klei bi kƀĭn online mơ̆ng Êpul khua kiă kriê bruă mdrơ̆ng hŏng klei ruă tưp ala čar hŏng 20 boh čar, ƀuôn prŏng hlăm gưl dlông, 209 boh kdriêk, kdriêk čar, wăl krah lehanăn 1 êbâo 60 coh să, ƀuôn hgŭm, wăl krah čiăng bi kjăp dŭm bruă gang mkhư̆ klei ruă tưp.

Klah čŭn klei bi kƀĭn, Khua knŭk kna Phạm Minh Chính mñă, mta kñăm prŏng hĭn ară anei jing gang mkhư̆, bi kdŭn pral, tŭ jing tui si Hdră mtrŭn mrô 86 mơ̆ng knŭk kna. Hlei čar ka dưi bi leh ôh mta kñăm mơ̆ng Hdră mtrŭn, bi ksiêm wĭt, hlak mblang ya ngă, boh nik ksiêm wĭt hlăm êpul lehanăn hlei pô mơ̆ng anăn pioh mă klei hriăm kơ klei kiă kriê, lehanăn gĭt gai. Khua knŭk kna lač, drei săn leh asei mlei tŭ lu klei luič hlăm bruă duh mkra ala ƀuôn, êjai dôk ngă klei bi kbưi yang ƀuôn, mtă bi ktang amâo mâo brei kbiă mơ̆ng sang, ti anôk dôk, dôk tianăn yơh, snăn bi ksiêm wĭt mkă tĭng čiăng dưi kiă kriê kjăp boh klei ruă tưp./.

Y Khem pô mblang