VOV4.Êđê- Aguah mbrue (7/6), khua knŭk kna Phạm Minh Chính mă leh bruă hŏng phung khua kiă kriê dŭm phŭn dhar bruă, phung kreh knhâo, phung khua bi ala dŭm knơ̆ng bruă ksiêm duah, puhng mkra mjing vaccine kơ bruă ksiêm duah, mkra mjing vaccine gang mkhư̆ klei ruă tưp Covid 19. Bi ala kơ phŭn bruă mdrao mgŭn mâo leh klei hâo mdah hŏng khua knŭk kna kơ dŭm boh tŭ dưn klei ksiêm duah, ba yua klei kreh knhâo hlăm bruă mdrao mgŭn, kñăm mdrơ̆ng hŏng klei ruă tưp covid 19 hlăm wưng êgao. Hlăm anăn, boh tŭ dưn ksiêm duah mkra mjing kit mkă dlăng kman, kit bi knăl kơ ai kdơ̆ng hŏng klei ruă mjing leh Việt Nam jing sa hlăm 5 ala čar mâo klei tŭ jing mkra kit anei.

Hdră mkă dlăng RT-PCR phŭn tal êlâo dơ̆ng mâo klei tŭ dưn jăk, srăng pral ba yua hlăm wưng kơ anăp. Truh kơ ară anei, kluôm ala mâo leh 2 knơ̆ng bruă ksiêm duah mkra mjing vaccine gang mkhư̆ klei ruă tưp covid 19 jing vaccine COVIVAC mơ̆ng knơ̆ng bruă Vaccine lehanăn êa drao Nha Trang. Blŭ hrăm ti anôk mă bruă, Khua knŭk kna Phạm Minh Chính lač, bruă čiăng bi mâo vaccine amâo mâo djŏ jing ênưih ôh, boh nik êjai hlăm klei ruă tưp dôk đĭ lar lu dlông rŏng lăn, klei dưi mkra mjing vaccine kƀah. Khua knŭk kna mtă kơ phung bi ala bi trông čhai, tĭng knăl, ai dưi, klei čiăng, bruă čuăn hlăm klei mkra mjing, răng kriê, mkŏ mjing tlŏ vaccine bi mâo klei tŭ dưn./.

Pô mblang: Y-Khem Niê