VOV4.Êđê - Aguah hruê 15/8, Khua knŭk kna Phạm Minh Chính gĭt gai leh klei bi kƀĭn online ksiêm wĭt hdră gang mkhư̆ klei ruă Covid 19 hŏng dŭm čar, ƀuôn prŏng dôk ngă hdră bi ktlah yang ƀuôn hluê si Asăp mtrŭn mrô 16/CT-TTg lehanăn pŏk hluê ngă Hdră mtrŭn mrô 86/NQ-CP mơ̆ng Knŭk kna kơ dŭm hdră msir mjêč kơ hdră gang mkhư̆ klei ruă Covid 19. Blŭ hrăm klah čŭn ti anôk bi kƀĭn, Khua knŭk kna Phạm Minh Chính mñă klă, hlăm wưng êgao, bruă hluê ngă asăp mtrŭn mrô 16 mơ̆ng Khua knŭk kna ti dŭm čar, ƀuôn prŏng ba wĭt leh boh tŭ dưn, djŏ mta kñăm kčah mtrŭn. Khua knŭk kna lač klă, klei ruă tưp dôk mâo dleh dưi ksiêm dlăng. Hŏng ai tiê “Mdrơ̆ng hŏng klei ruă tưp msĕ si bi kdơ̆ng hŏng phung roh”, brei iêu mtrŭt jih anôk bruă kđi čar, jih jang mnuih  nao hgŭm hlăm hdră gang mkhư̆ klei ruă tưp.

Khua knŭk kna mñă, brei tlŏ vaccine amâo mâo mă prăk kơ jih jang mnuih ƀuôn sang. Phŭn bruă mdrao mgŭn jing anôk bruă kriê dlăng knŭk kna tŭ đua klam kơ bruă tĭng dlăng hnơ̆ng tŭ jăk, mkăp hră dưi yua, kriê pioh; amâo mkŏ mjing hdră tlŏ mgang hluê klei kuôl kă hlei čiăng tlŏ brei tla prăk, hlei ngă soh tŭ klei bi kmhal mtam. Dŭm čar, ƀuôn prŏng dôk hluê ngă Asăp mtrŭn mrô 16 brei mđing kơ hdră gang mkhư̆ klei ruă tưp, ti anôk dưi ksiêm dlăng leh brei mđĭng mđĭ kyar bruă duh mkra./.

H Nêč pô mblang