VOV4.Êđê- Adŭ bruă Knŭk kna mrâo mâo Klei hưn mthâo klei klah čŭn mơ̆ng Khua knŭk kna Phạm Minh Chính (mrô 133 hruê 29/5/2021) hlăm klei bi kƀĭn kơ boh klei, klei tŭ bruă knuă leh anăn dŭm bruă adôk gun kpăk mjêč brei kƀĭn gĭt gai mơ̆ng Phŭn bruă tuh tia mnia blei. Hluê anăn, Khua Knŭk kna jao kơ K’iăng Khua knŭk kna Lê Văn Thành kƀĭn gĭt gai, ktuê dlăng bi klă mta phŭn Hdră čuăl mkă Pui kmlă 8 rơ̆ng djŏ guôp hŏng boh sĭt, dưm klei tŭ dưn ala čar leh anăn djuê ana êlâo hĭn, boh nik mđing kơ hdră bi kdơ̆ng hŏng klei amâo jăk hlăm hdră êlan, hlei pô ngă soh brei đŭ bi kmhal bi djŏ tui si klei kčah mtrŭn mơ̆ng Đảng leh anăn hdră bhiăn mơ̆ng Knŭk kna. Hlăm anăn brei mđing ksiêm hriăm hlak mblang bi djŏ kơ ênoh pui kmlă; bruă bi knar djŏ guôp kơ dŭm phŭn pui kmlă (msĕ si pui kmlă êran hŏng êa, hŏng hdăng boh tâo lehanăn êa pui, pui kmlă bi êran hŏng pil yang hrue lehanăn ai angĭn) leh anăn rơ̆ng klei djŏ guôp ti krah dŭm krĭng, kwar đăm luič liê mang klei găl yang ƀuôn.

            Pô mblang: H’Zawut Ƀuôn Yă