VOV4.Êđê- Leh klei nao čuă lehanăn mă bruă mrâo anei ti anôk mkra mjing vaccine pioh kơ bruă mdrơ̆ng hŏng klei ruă tưp covid 19, Khua knŭk kna Phạm Minh Chính mâo klei mtă, mđing kiă kriê, gĭt gai mjing djăp klei găl jih hnơ̆ng, dăp mnuih ksiêm duah, ba yua kdrăp mă bruă mrâo mrang čiăng pral dưi mkra mjing vaccine hlăm ala čar, pioh kơ bruă mdrơ̆ng hŏng klei ruă tưp Covid 19. Ktưn truh kơ mlan 6 thŭn 2022 srăng dưi mkra mjing. Hŏng klei ksiêm duah kjăp, dŭm phŭn dhar bruă lehanăn alŭ wăl djŏ tuôm mâo bruă klam, mjing djăp klei găl, ruh mgaih jih klei dleh dlan, klei gun kpăk kơ bruă ksiêm duah lehanăn mkra mjing vaccine. Khua knŭk kna jao kơ phŭn bruă mdrao mgŭn kiă kriê lehanăn hgŭm hŏng dŭm phŭn dhar bruă mkŏ mjing hdră mă bruă, čiăng dưi ngă pral, djăp ênoh čuăn mâo klei êđăp ênang, ksiêm duah mkra mjing khuăt pral kơ hrue mmông, kñăm hâo mdah hŏng dŭm gưl ksiêm dlăng lehanăn bi mklă./.

Pô mblang: Y-Khem Niê