VOV4.Êđê- Khua knŭk kna mrâo mâo leh hdră mtrŭn mrô 1163/QĐ-TTg bi klă kơ hdră êlan mđĭ kyar bruă duh mkra mnia mblei hlăm ala čar wưng thŭn truh kơ 2030, tă hdră truh kơ thŭn 2045. Mta kñăm kluôm kơ hdră êlan anăn jing: “Mđĭ kyar bruă duh mkra mnia mblei hlăm ala čar hŏng ênuk mrâo, kreh dhar, mâo klei đĭ kyar pral lehanăn kjăp, jing atur dră, anôk jưh knang kjăp kơ bruă duh mkra hlăm ala čar knư̆ hrue knư̆ mâo klei mlih mrâo, đĭ kyar, mkŏ mjing anăn knăl mnơ̆ng dhơ̆ng Việt Nam, răng kriê klei tŭ dưn kơ mnuih yua, phung duh mkra, mnia mblei hlăm ala čar lehanăn kơ klei duh mkra, bi năng hŏng klei đĭ kyar lăn čar ară anei, mjing knơ̆ng kjăp pioh hlăm bruă ñŭ kma êlam hĭn hlăm klei duh mkra alŭ wăl, lehanăn tar rŏng lăn”. Mta kñăm hlăm wưng thŭn 2021 – 2030; hnơ̆ng đĭ kyar mâo klei tŭ dưn kơ klei mnia mblei hlăm ala čar mâo hlăm brô 9 – 9,5%/thŭn, truh kơ thŭn 2030 mâo đru mguôp hlăm brô 15,0-15,5% hlăm GDP kluôm ala, hnơ̆ng hrui wĭt bruă mnia mblei mnơ̆ng điện tử truh 10,5 - 11% hnơ̆ng čhĭ hliê jih jang, djăp ênoh đĭ kyar kah knar jing mơ̆ng 20 – 21%/thŭn./.

Pô mblang: Y-Khem Niê