VOV4.Êđê- Khua knŭk kna Phạm Minh Chính kiă kriê klei bi kƀĭn online êpul khua kiă kriê knŭk kna hŏng ƀuôn prŏng Hồ Chí Minh, lehanăn dŭm čar Bình Dương, Đồng Nai, Long An kơ bruă mdrơ̆ng hŏng klei ruă tưp Covid 19, êjai klei ruă tưp ti ƀuôn prŏng Hồ Chí Minh hlăk dleh dưi ksiêm dlăng. Ti anôk bi kƀĭn, Khua prŏng hlăm knŭk kna lehanăn puhng khua kiă kriê ƀuôn prŏng Hồ Chí Minh bi tŭ ư leh lŏ hyua kjăp hĭn hdră mtrŭn mrô 16, ba yua djăp hdră ktang hĭn, lehanăn mâo klei tŭ jing hĭn kñăm dưi gang mkhư̆ lehanăn msưh kdŭn klei ruă tưp, hlue hdră “Grăp să, ƀuôn hgŭm jing sa boh kđông” mkhư̆ gang klei ruă tưp.

Ngă klei bi ktlah kjăp hĭn čiăng dưi gang mkhư̆ phŭn ba klei bi mtưp, bi hrŏ ênoh mnuih ruă, bi hrŏ ênoh mnuih djiê. Srăng mâo đa đa klei dleh truh hlăm klei hdĭp, ƀiădah kyua kơ klei suaih pral jih jang mnuih, čiăng dưi mâo klei hdĭp lŏ wĭt msĕ si aguah tlam, êđăp ênang trei mđao. Khua knŭk kna mñă, mkŏ mjing klei mkă dlăng kman hŏng klei pral hlue djŏ klei phŭn bruă mdrao mgŭn ktrâo atăt, wăt hŏng klei nao truh hlăm grăp boh sang mkă dlăng, ksiêk mnuih ruă kbiă đuĕ mơ̆ng yang ƀuôn./.

Pô mblang: Y-Khem Niê