VOV4.Êđê - Ti Hà Nội, bruă Đảng kahan gưl dlông, phŭn bruă lĭng kahan mkŏ mjing leh klei bi kƀĭn kđĭ čar bruă lĭng kahan 6 mlan akŏ thŭn 2021. Khua hlăm phŭn bruă kđi čar, khua knŭk kna Phạm Minh Chính nao hgŭm lehanăn kčĕ kơ klei kƀĭn. Thượng tướng Phan Văn Giang, khua hlăm phŭn bruă kđi čar, k’iăng khua kiă kriê bruă Đảng kahan gưl dlông, khua phŭn bruă lĭng kahan kiă kriê klei kƀĭn anei. Blŭ hlăm ti anôk bi kƀĭn anei, khua knŭk kna Phạm Minh Chính yap yuôm bhăn kyua dŭm čô bi ala mâo leh klei bi trông êngiê, mâo bruă klam lehanăn mâo lu klei đru kčĕ yuôm bhăn, bi mbŏ lehanăn bi kluôm ênŭm klei bi mklă kơ bruă klam. Klei kƀĭn dưi bi êdah leh dŭm bruă klam hlăm 6 mlan knhal jih thŭn 2021. Tui hluê anăn, jih jang lĭng kahan srăng lŏ tui ngă hdră mtrŭn mơ̆ng klei kƀĭn kluôm 13 mơ̆ng Đảng, hdră mtrŭn mơ̆ng klei kƀĭn kluôm bruă Đảng kahan tal 11 lehanăn dŭ mbruă klam kñăm hlăm wưng thŭn 2021-2026. Bruă Đảng kahan gưl dlông, phŭn bruă lĭng kahan dưi bi mklă leh dŭm hdră êlan, bruă klam hlăm hruê mmông kơ anăp, hlăm anăn mâo dŭm bruă čŏng ngă, mâo klei thâo, klei đăo knăl hnưm, čih yap kơ boh klei, hmao đru kčĕ hdră êlan hŏng Đảng, knŭk kna čiăng mgaih msir dŭm boh klei, lŏ tui ngă dŭm hdră mtrŭn, hdră êlan, klei bi mklă, hdră mkăp, hdră êlan klei bhiăn hlăm bruă lĭng kahan.

Y Ƀel pô mblang