VOV4.Êđê - Aguah mbrue (22/6), ti anôk bruă Phŭn bruă kahan ksiêm, khua knŭk kna Phạm Minh Chính nao hlăm knăm ksiêm wĭt bruă mkŏ mjing, hlue ngă dŭm bruă kriê pioh kơ ênoh ênil mơ̆ng knŭk kna kơ anak mnuih, kơ bruă duh mkra, lehanăn kơ klei kiă kriê kak asei grăp čô mnuih, lehanăn Knăm bi êdah klei mphŭn dưn yua jih jang hdră mă bruă kčưm mơ̆ng hrue 1/7/2021.

Blŭ hrăm hlăm knăm anei, bi ala kơ puhng khua gĭt gai Đảng, knŭk kna, khua knŭk kna Phạm Minh Chính bi mni kơ jih klei gĭr lehanăn boh tŭ dưn leh mâo mơ̆ng Phŭn bruă kahan ksiêm, bruă kahan ksiêm djăp alŭ wăl, hrăm mbĭt sa ai mă bruă bi kđrăp hŏng klei ttŭ dưn jih jang bruă anei, đru mkăm pioh ênoh ênil mơ̆ng ala čar kơ anak mnuih Việt Nam. Khua knŭk kna mñă, anei jing bruă yuôm bhăn, mâo klei bi klin, bi lar, mâo klei tŭ dưn klă mngač nanao kơ mgi dih, ƀiădah klei lông dlăng ti anăp ăt adôk lu. Khua knŭk kna lač, bruă mkŏ mjing hdră mă bruă hŏng kdrăp mrâo anei, klă sĭt jing mrâo mrang ba yua kơ klei hdĭp, dưn yua jih klei tŭ dưn, phung ƀuôn sang lehanăn phung duh mkra srăng dưi dưn klei jăk sĭt, anăn yơh jing klei Đảng, knŭk kna dôk čang guôn, dôk hmăng hmưi mơ̆ng jih yang ƀuôn, lehanăn phung ƀuôn sang./.

Y Khem pô mblang